अन्तर्राष्ट्रिय स्तरमा इन्टरनेटको स्पिड जाँच गर्ने एजेन्सी ओक्लाका अनुसार विश्वमा सबैभन्दा उच्च गतिको मोबाइल इन्टरनेट सेवा भएको मुलुक नर्वे हो ।
पछिल्लो १३ महिनामा नर्वेले मोबाइल इन्टरनेटको क्षेत्रमा अद्धितीय फड्को मार्दै शीर्षस्थानमा पुगेको हो । यसबीचमा नर्वेले मोबाइल इन्टरनेट स्पिडमा आफ्नो अवस्था ११ स्थान माथि पुर्याउन सफल भएको छ ।
ओक्लाले इन्टरनेट स्पिड मापन गर्नका लागि स्पिडटेस्ट डट नेट नामक एप तयार गरेको छ । जसको सहयोगमा प्रयोगकर्ताले स्मार्टफोनमै जुनसुकै बेला आफ्नो इन्टरनेटको स्पिड जाँच गर्न सक्छन् ।
स्पिडटेस्ट डट नेटको आँकडा अनुसार नर्वेको मोबाइल फोनमा चल्ने इन्टरनेटको स्पिडमा पछिल्लो एक वर्षमा ६९ प्रतिशतले तीव्रता आएको छ । अहिले त्यहाँको इन्टरनेटको स्पिड ५२.६ मेगाबाइट प्रतिसेकेण्ड रहेको छ ।
नर्वेको दूरसञ्चार सेवा प्रदायक टेलिनरले गत सेप्टेम्बरमा व्यक्तिगत स्तरमा प्रयोग हुने इन्टरनेटको स्पिड बढाइदिएको थियो । नर्वेमा टेलिनरसहित कुल तीनवटा दूरसञ्चार एजेन्सी छन् । जसले आफ्नो मोबाइल नेटवर्क स्थापित गरेका छन् ।
हालैका वर्षहरुमा अन्य दुई कम्पनी टेलिया र आइस डट नेटले पनि आफ्नो फोरजी नेटवर्क सुदृढ पार्नका लागि धेरै लगानी गरेका छन् ।
विश्वमा सबैभन्दा तीव्र गतिको मोबाइल इन्टरनेट सेवाको हिसाबले नेदरल्याण्ड दोश्रो स्थानमा छ भने हंगेरी तेश्रो स्थानमा रहेको छ । त्यस्तै चौथोमा सिंगापुर र पाचौंमा माल्टा रहेको छ । अष्ट्रेलिया, युएइ, दक्षिण कोरिया, बेल्जियम र आइसल्याण्ड क्रमशः दशौँ स्थानसम्म रहेका छन् ।
चीन पन्ध्रौँ, अष्ट्रिया अठारौँ, बेलायत चालीसौँ, अमेरिका ४६ औँ र जापान ५५ औँ स्थानमा रहेका छन् । त्यस्तै, पाकिस्तान ९८ औँ, श्रीलंका १०२ औँ स्थानमा रहेका छन् ।
भारत भन्दा नेपाल अगाडि
विश्वमा मोबाइल इन्टरनेटको स्पिडमा भारत भन्दा नेपाल एक स्थान अगाडि देखिएको छ । स्पिडटेस्ट ग्लोबल इन्डेक्स अनुसार नेपाल १११ औँ स्थानमा छ भने भारत ११२ औँ स्थानमा छ । ओक्लाको रिपोर्टमा नेपालको मोबाइल इन्टरनेटको स्पीड ८.३२ बाइट प्रतिसेकेण्ड र भारतको ८.१८ प्रतिसेकेण्ड रहेको देखाएको छ ।
दक्षिण एसियाली देशहरु मध्ये अफगानिस्तान ११९ र बंगलादेश १२० औँ स्थानमा रहेका छन् ।
फिक्स्ड ब्रोडब्याण्ड इन्टरनेटमा सिंगापुर पहिलो
मोबाइल इन्टरनेटमा नर्वे पहिलो स्थानमा भएपनि फिक्स्ड ब्रोडब्याण्ड इन्टरनेटमा चाहीँ सिंगापुर पहिलो स्थानमा रहेको छ । दक्षिण कोरिया, हङकङ, आइसल्याण्ड, रोमानिया, मकाउ, स्विजरल्याण्ड, स्विडेन, अमेरिका र लिथुआनिया क्रमशः पहिलो दश स्थानभित्र रहेका छन् ।
फिक्स्ड ब्रोडब्याण्ड इन्टरनेटमा नेपाल चाहीँ १०२औँ स्थानमा रहेको छ ।
एजेन्सी