गृहको मर्यादाक्रम जनप्रतिनिधिलाई अस्वीकार्य

२० भदौ, काठमाडौं । स्थानीय तहका नवनिर्वाचित जनप्रतिनिधिहरुको बरियताक्रम निर्धारण गर्दा कर्मचारीतन्त्र हाबी भएको र जनप्रतिनिधिको हूर्मत लिन खोजिएको आरोप लागेको छ ।

सरकारी पदाधिकारीहरुको नयाँ मर्यादाक्रम तत्काल नसच्याए आन्दोलन शुरु गर्ने चेतावनी नगर र गाउँपालिकाका पदाधिकारीले दिएका छन् ।

स्थानीय तहमा जनप्रतिनिधि निर्वाचित भएको यथार्थलाई कर्मचारीतन्त्रले पचाउनै नसकेका कारण पाइला पाइलामा अवरोध सिर्जना गरिएको नगरपालिका संघका अध्यक्ष डोरमणि पौडेलले बताए । उनका अनुसार यसबारे राजनीतिक नेतृत्व र संसदको ध्यानाकर्षण गराइएको छ ।

गृहमन्त्रालयले स्थानीय तहमा जनप्रतिनिधि निर्वाचित भइसकेपछि सरकारी पदाधिकारीहरुको नयाँ मर्यादाक्रम निर्धारण गरेको छ । जुन बरियतालाई ८ तहमा विभाजन गरिएको छ । बरियताको पहिलो नम्बरमा राष्ट्रपतिलाई राखिएको छ भने २८ औं नम्बरमा नेपाली सेनाको सहायक सेनानी छन् ।

गाउँपालिका अध्यक्षको मर्यादाक्रम २५ औं नम्बरमा राखिएको छ । त्यसमा पनि गाउँपालिका नभनी पूरानै गाविस भनिएको छ । गाउँपालिका महासंघका ३ नम्बर प्रदेश संयोजक इश्वरचन्द्र पोखरेलले मर्यादाक्रम आपत्तिजनक र अश्वीकार्य रहेको बताए ।

‘स्थानीय तहको चुनाव भइसकेपछि ल्याइएको मर्यादाक्रममा गाउँपालिका नभनी गाविस लेखिएको छ, त्यो आफैं त्रुटिपूर्ण छ’ दोलखाको तामाकोशी गाउँपालिका अध्यक्षसमेत रहेका पोखरेलले भने, अर्को कुरा जनप्रतिनिधिलाई अपमान गर्ने गरी अधिकृत तहका सरकारी कर्मचारीभन्दा तल राखिएको छ, यो स्वीकार्य छैन भनेर हामीले भनिसकेका छौं ।’

गाउँपालिकाको कार्यकारी अधिकृत उपसचिव तहको कर्मचारी हुने भनिएको छ । जबकि गाउँपालिका अध्यक्षको मर्यादाक्रम उपसचिवभन्दा तीन तह तल राखिएको छ । उपसचिवलाई २५ औं नम्बरमा राखिएको छ भने गाउँपालिका अध्यक्षलाई सेनानी, डिएसपीहरुको लहरमा राखिएको छ ।

गाउँपालिका महासंघले गाउँपालिका अध्यक्षलाई कम्तिमा सहसचिव सरहको बरियतामा राखिनुपर्ने सुझाव दिएको छ । मुख्य सचिव, गृहसचिवलगायत सरकारी अधिकारी र मन्त्रीहरुलाई समेत भेटेर सुझाव दिइएको महासंघले जनाएको छ ।

गृहमन्त्रालयले उपमहानगरपालिका र नगरपालिकाका मेयरलाई सहसचिव सरहको मर्यादाक्रममा राखेको छ । महानगरपालिकाका मेयर र जिल्ला समन्वय समितिका प्रमुखलाई सहसचिवभन्दा एक तहमाथि १८ औं नम्बरको बरियतामा राखिएको छ ।

‘नेपाल सरकारको सचिवभन्दा ३ लाख जनताबाट चुनिएको काठमाडौं महानगरको मेयरको मर्यादा तल राख्नु भनेको जनताको अपमान हो’ पौडेलले भने, ‘यस्तो अपमानजनक मर्यादाक्रम जनप्रतिनिधिहरुले स्वीकार गर्नु हुँदैन ।’

अहिले सार्वजनिक गरिएको मर्यादाक्रम अत्यन्तै गलत ढंगले ल्याइएको भन्दै गाविस महासंघका संयोजक पोखरेलले गृहमन्त्रालयले नसच्याएमा जनप्रतिनिधिले आन्दोलन गर्ने चेतावनी दिए । यसबारेमा महासंघको बैठक बसेर निर्णय लिइने ३ नम्बर प्रदेश सदस्य तथा फिक्कल गाउँपालिका सिन्धुलीकी उपाध्यक्ष पार्वती सुनुवारले बताइन् ।

यस्तो छ सरकारी पदाधिकारीहरुको मर्यादाक्रम :