१२ असोज, काठमाडौं । भुटानको थिम्पुमा बुधबार सम्पन्न अठार वर्ष मुनीको साफ फुटबल प्रतियोगिता बिजेता नेपाली टोली बिहीबार स्वदेश फर्किएको छ ।
बिहीबार अपरान्ह त्रिभुवन अन्तर्राष्ट्रिय विमानस्थलमा उत्रिएका नेपाली खेलाडीलाई स्वागत तथा बधाई दिन अखिल नेपाल फुटबल संघ -एन्फा)का पदाधिकारी तथा फुटबलप्रेमी समर्थकहरु त्रिभुवन अन्तराष्ट्रिय विमानस्थल पुगेका थिए ।
खेलाडीको विमानस्थलमा भव्य स्वागत गरिएको थियो । विजेता खेलाडीले पहिलो खेल भुटानसँग हार्नु नै आफूहरुको जीत भएको बताएका छन् । सोही हारबाट सिक्दै थप रणनीति बनाउन सफल भएकाले बिजय प्राप्त गरेको क्याप्टेन अर्पण कार्कीले बताए ।
फुटबलमा बिजय हासिल गरेर आफूहरुले नेपाली दाजुभाई दिदीबहिनीलाई वडा दशैंको अवसरमा जीतको सबैभन्दा ठूलो उपहार दिन सकेको पनि कार्कीले बताए ।
फुटबल प्रशिक्षक छिरिङ लोप्साङले पहिलो पटक कोच भएर अन्तर्राष्ट्रिय खेल खेलाउँदा प्राप्त भएको बिजयले आफूलाई सफल तथा खुसी बनाएको प्रतिक्रिया दिए ।
भुटानमा भएको खेलमा भारतलाई २-० ले हराउँदै नेपालले उपाधी जितेको थियो । दुबै गोल दिनेश हेन्जनले गरेका थिए ।
दुई वर्षअघि नेपालले घरेलु मैदानमा आयोजित १९ बर्ष मुनिको साफ फुटबलको पहिलो उपाधि जितेको थियो । त्यसपछि भने यो प्रतियोगिता १८ बर्ष मुनिको ढाँचामा खेलाउन थालिएको हो । प्रतियोगितामा सहभागी दक्षिण एसियाका पाँच टोलीहरु सबैले एक-अर्कासँग खेलेपछि सबैभन्दा बढी अंक प्राप्त गर्ने टोली विजेता बनेको हो ।
नेपाल र बंगलादेशको बराबर ९ अंक भएपछि ‘हेड टु हेड’का आधारमा नेपाल विजेता बनेको हो । समूहको खेलमा नेपालले बंगलादेशलाई २-१ ले हराएको थियो ।