बुधबार, ६ मंसिर, २०७४
OnlineKhabar.com

दिनदहाडै यसरी मारिएका थिए गौचनः प्रकाशले ढुंगा हाने, राजीवले गोली चलाए

गौरव पोखरेल

२८ कात्तिक, काठमाडौं । २३ असोजको मध्यदिनमा निर्माण व्यवसायी महासंघका अध्यक्ष शरदकुमार गौचनको गोली प्रहार भयो । दुई राउण्ड गोली लागेका उनलाई अस्पताल त पुर्‍याइयो तर, मृत्यु भइसकेको थियो ।

राजधानीको व्यस्त सडकमा व्यवसायीको दिउँसै गोली प्रहार भएपछि धेरैले जिब्रो टोके । दिउँसै गोली हानेर व्यवसायीको ज्यान लिँदा पनि प्रहरीले सुइकोसम्म पाएनन् भने आक्रमणकारी सजिलै भागे ।

घटना भएको पाँच सातापछि सुटरसहित ५ जनालाई सार्वजनिक गर्ने क्रममा प्रहरीले घटना कसरी भयो भन्ने केही जवाफ दिएको छ ।

यसरी मारिए गौचन

सदाझैं गौचन त्यो दिन पनि शान्तिनगरस्थित आफ्नो घरबाट बा १३ च ४९४८ नम्बरको ल्याण्ड क्रुजर गाडीबाट महासंघ कार्यालय आउँदै थिए । उनको साथमा थिए, चालक रामकुमार खत्री ।

खरिबोट चोक नजिक दुई जना युवा उनलाई कुरेर बसेका थिए । गौचन सवार गाडी त्यहाँ पुग्ने वित्तिकै २२ वर्षीय प्रकाश बुढाथोकीले ढुंगा प्रहार गरे । गाडीको अगाडीको सिसामा ढुंगा हानेका उनी भागे ।

गौचन हत्याकाण्डको अनुसन्धान समितिका प्रमुख डीआईजी गणेश केसीका अनुसार उनी त्यहाँ कतिवेला गौचन निस्किन्छन् ? अन्य मान्छेले देखेका छन् कि छैनन् ? भन्ने हेर्न र ढुंगा हान्न नै बसेका थिए ।

ढुंगा लागेपछि गौचन सवार कार रोकियो । प्रहरीका अनुसार गाडी राकिने वित्तिकै २१ वर्षीय पेशेवर सुटर राजिव स्याङ्ताङले गोली हाने गरे । उनी गाडीको अगाडि गए र ड्याङ … ड्याङ दुई राउण्ड गोली चलाए ।

गोली शिशा छेडेर गौचनको पेटमा लाग्यो । बुढाथोकी र स्याङ्ताङ एकैतर्फ भागे । केहीपर उनीहरुलाई मोटरसाइकल तयार थियो । जुन मोटरसाइकलको व्यवस्थापन गरेका थिए, १८ वर्षीय सन्तोष गुरुङले ।

उनी पर्साको ठोरी गाउँपालिका-५ का हुन् ।

सीसी टिभी फुटेजमा देखिएअनुसार गोली प्रहारपछि स्याङ्ताङले केहीपर पुगेर माक्स र ज्याकेट फ्याले । त्यस दिन उनले सेतो टिसर्ट लगाएका थिए, सोमबार प्रहरीले पक्राउ गर्दा पनि उनी त्यही टिसर्टमा भेटिए ।

उनी नुवाकोटमा लुकेर बसेको अवस्थामा पक्राउ परेका हुन् । बुढाथोकी भने राजधानीमै ठाउँ परिवर्तन गर्दै लुकिछिपी बस्दै आएका थिए ।

उनीहरुलाई हतियार र मोटरसाइकल व्यवस्थापन गर्ने पर्साका ३५ वर्षीय शिवजी महतो र भारत विहारका २४ वर्षीय मुकेशकुमार पाण्डे समेत पक्राउ परेका छन् । घटनामा भारतबाट चोरी गरेर साइन मोटरसाइकल ल्याइ नेपाली नम्बर बा ३५ प २४६१ राखेर प्रयोग गरिएको भेटिएको छ ।

घटनामा प्रयोग गरिएको हतियार भने भारतको वेतियाबाट नेपाली रुपैयाँ ६५ हजारमा खरिद गरिएको खुलेको छ ।

घटनाको विषयमा थप अनुसन्धान भइरहेको छ ।

हत्यामा दुई भगौडा आर्मीको पनि संलग्नता

प्रहरीका अनुसार निर्माण व्यवसायी महासंघका अध्यक्ष गौचनको हत्याको योजनाकार गुण्डानाइके समिरमान सिंह बस्नेत हुन् । उनलाई मनोज पुनले पनि सहयोग गरेका थिए ।

मागे जति रकम नदिँदा गौचनको हत्या भएको प्रहरीले जनाएको छ । यद्यपि, कति रकम हो भन्ने खुलेको छैन ।

घटनामा संलग्न भएको अभियोगमा ५ जना पक्राउ परेपनि ८ जना अझै फरार छन् । फरार रहेका मध्ये दुई जना भगौडा आर्मी भएको अनुसन्धानबाट खुलेको छ । प्रहरीका अनुसार घटनामा संलग्न श्यामबहादुर गुम्बे र काले दाई भनिने अमरबहादुर राणा आर्मीबाट भागेका भगौडा हुन् ।

घटनामा राणा समेत सुटरको रुपमा प्रयोग भएका थिए । गुम्बे समेत घटनामा सहयोगीको भूमिकामा छन् ।

घटनाको नेतृत्व समिरमान सिंह बस्नेतले गरेका अनुसन्धान टोलीका नेतृत्व गरेका डिआइजी गणेश केसीले बताए । बस्नेत काठमाडौंमा रहेर लामो समयदेखि व्यवसायीबाट चन्दा उठाउने, ठेक्कापट्टामा हस्तक्षेप गर्ने र व्यक्ति अपहरण गर्ने लगायतका कार्यमा संलग्न रहँदै आएका थिए ।

उनले मागे जति रकम नदिँदा गौचनको हत्या भएको प्रहरीले जनाएको छ । यद्यपि, कति रकम हो भन्ने खुलेको छैन ।

यसबारे थप अनुसन्धान भइरहेको प्रहरीले जनाएको छ । बस्नेत भारतमा लुकेर बसेको प्रहरीको आशंका छ । युवा संघ, रुपन्देहीका अध्यक्ष दुर्गा तिवारीको हत्यामा संलग्न मनोज पनि फरार अभियुक्त हुन् ।

अर्का अभियुक्त लोप्साङले बस्नेत र पुनकै कमाण्डमा रहेर नेपालमा अपराधिक क्रियाकलाप गर्दै आएको प्रहरीले बताएको छ ।

घटनामा बोका भनिने गंगा लिङ्देन लिम्बुको संलग्नता समेत खुलेको छ । बस्नेतको पारिवारिक नाताभित्र पर्ने रोशन बुढाथोकी समेत सम्पूर्ण काम फत्ते गर्न प्रयोग भएका थिए । घटना संलग्न अर्का अभियुक्त अजय थापा समेत फरार छन् । उनीहरु यसअघि पनि अपराधिक क्रियाकलापमा संलग्न थिए ।

यो पनि पढ्नुस्

फिरौती नदिएकै कारण गौचनको हत्या, समिरमान योजनाकार

गौचन हत्यामा संलग्न सुटरसहित ५ पक्राउ, मुख्य योजनाकार भने फरार

२०७४ कार्तिक २८ गते १९:३५ मा प्रकाशित (२०७४ कार्तिक २९ गते १९:३८मा अद्यावधिक गरिएको)

सम्बन्धित शीर्षकहरु

अनलाइनखबर सिधै एपबाट खोल्नुहोस् । एन्ड्रोइडका लागि यहाँ र आइफोनका लागि यहाँ क्लिक गर्नुहोस् । तपाईं हामीसंग फेसबुक, ट्वीटरयुट्युव मार्फत् पनि जोडिन सक्नुहुन्छ ।

मुख्य खबरहरु

१ प्रतिकृया प्राप्त
  • Ramhari Thapa Magar लेख्नुहुन्छ    |   २०७४ कार्तिक २८ गते २२:१३

    Welldone Nepal Police,,,

    1
    0
    Share

यसमा तपाइको मत




फेसबुकबाट तपाईको प्रतिक्रिया

Also you may like this