८ मंसिर, रसुवा । मौन अवधि शुरु हुनुभन्दा केही समय अगाडि राजनीतिक दलका कार्यकर्ताबीच झडप हुने स्थिति आएपछि गएराति ११ बजे दक्षिणी रसुवाको कालिकास्थान क्षेत्रमा हवाइ फायरिङ भएको छ ।
लोकतान्त्रिक गठबन्धन र वाम गठबन्धनका कार्यकर्ताबीच एकआपसमा भिडन्त हुन थालेपछि अवस्था तनावग्रस्त बनेको थियो । स्थिति नियन्त्रण बाहिर जान लागेपछि प्रहरीले १३ राउण्ड हवाइ फायरिङ नै गर्नुपरेको थियो । हवाइ फायरपछि दुवैतर्फका कार्यकर्ता तितरवितर भएका थिए ।
गएराति तनाव भए पनि अहिले त्यस क्षेत्रको स्थिति सामान्य रहेको प्रमुख जिल्ला अधिकारी चोमेन्द्र न्यौपानेले जानकारी दिए ।
प्रजिअ न्याैपानेका अनुसार, मतदातालाई सुरक्षाको प्रत्याभूति दिलाउन थप प्रहरी परिचालन गरिएकाे छ ।
