ठमेलमा तेस्रोलिङ्गी लुटेराको समूह: एक जना समातिए, ४ फरार

४ फागुन, काठमाडौं । प्रहरीले नगद लुटपाटमा संलग्न तेस्रोलिङ्गी समूहको एक जनालाई पक्राउ परेको छ । पक्राउ पर्नेमा लाजिम्पाट बस्ने चितवन भरतपुर–२ की २० वर्षीया नितसा परियार छन् ।

काठमाडौं महानगरपालिका–२६ ठमेलस्थित संचयकोष चोक नजिक गल्लीबाट नगद लुटेर भाग्दै गर्दा उनलाई प्रहरीले पक्राउ गरेको हो । अन्य ४ जना भने भाग्न सफल भएका छन् । उनीहरुको खोजी कार्य प्रहरीले जारी राखेको छ ।

उनीहरुले सिन्धुपाल्चोक मेलम्ची नगरपालिका–१२ का ३४ वर्षीय सोमराज घलानको साथबाट १ लाख २५ हजार लुटेर भागेका थिए ।

लुटिएको मध्ये ३२ हजार रुपैयाँ प्रहरीले बरामद गरेको छ ।

थप अनुसन्धान भइरहेको प्रहरीले जनाएको छ ।