९ वैशाख, काठमाडौं । प्रधानमन्त्री केपी शर्मा ओलीले दक्षिण एशियाली क्षेत्रीय सहयोग संगठन -सार्क) मा देखिएको असमझदारी हटाउन पहल भइरहेको बताएका छन् ।
हाल सार्कको अध्यक्षसमेत रहेका प्रधानमन्त्री ओलीले सार्कमा देखिएको असमझदारी हटाउन आफूले भारतीय प्रधानमन्त्री नरेन्द्र मोदी र पाकिस्तानका प्रधानमन्त्री साहिद खकान अब्बासीसँग आग्रह गरेको पनि स्पष्ट पारे ।
आइतबार काठमाडौंमा ‘रिजनल कन्फरेन्स अफ सार्क इफेक्भिनेस’ नामक पुस्तकको विमोचन गर्दै उनले भारत र पाकिस्तानकै कारण सार्क क्षेत्रमा देखिएको असमझदारी हटाउन अध्यक्ष राष्ट्रको हैसियतमा नेपालले वार्तालाई जोड दिएको पनि बताए ।
प्रधानमन्त्री ओलीले राष्ट्रहरुबीचको असमझदारीका कारण दुई देशीय, क्षेत्रीय वा अन्तराष्ट्रिय संगठनको औचित्यमाथि प्रश्न उठाउन उपयुक्त नहुने तर्क पनि गरे ।
प्रधानमन्त्री ओलीले नेपाल भ्रमणमा आएका पाकिस्तानी प्रधानमन्त्री अब्बासी र भारत भ्रमणमा जाँदा भारतीय प्रधानमन्त्री मोदीसँग सार्क भित्रका असमझदारी हटाउन आग्रह गरेको बताए ।
प्रधानमन्त्री ओलीले नेपालमै सार्कको सचिवालय भएकाले पनि यसको प्रभावकारी सञ्चालनका लागि आवश्यक पहल गर्ने दायित्व नेपालमाथि रहेको पनि स्मरण गराए ।
