१ जेठ, यूएई । यूएईमा रहेका स्याङ्जाका प्रकाश ढकालले निर्देशन गरेको म्युजिक भिडियो सार्वजनिक भएको छ ।
यूएईका रमणीय स्थलहरुमा छायांकन गरिएको र यूएईमै श्रमरत नेपालीहरुले अभिनय गरेको आधुनिक गीत बजारमा आएको हो ।
बिकेश रोजको आवाजमा सजिएको उक्त गीतको भिडियोमा रोजगारको सिलसिलामा यूएईमै रहेका कलापारखिहरुले आफ्नो क्षमता प्रदर्शन गरेका छन् ।
यूएईको फुजेरा, अलडिब्बा तथा बरदुबई वरिपरि छायांकन गरिएको ‘यही मन्दिरमा कसम खाइ’ भन्ने आधुनिक गीतलाई बोहोरा इन्टरटेन्टमेन्टले बजारमा ल्याएको छ ।
दिनेशकुमार रोक्काको शब्द, कुमार थापाको एरेन्ज तथा बिष्णुहरी अधिकारीले संगीत भरेको उक्त भिडियोको निर्देशन प्रकाश ढकालले गरेका हुन् ।
पत्रकारिता क्षेत्रमा समेत लागेका ढकाल स्याङ्जा सहयोग समाजका सचिवका रूपमा रहेर समेत काम गरेका छन् ।
उनले यस अगाडि करिब एक दर्जन भिडियोमा आँफै अभिनय गरेका थिए । निर्देशनमा यो उनको पहिलो प्रयास हो ।
नयाँ ठाउँ, नयाँ कलाकारहरु साथै भिडियोमा चाहिने सामग्री तथा सही स्थान नमिल्दा धेरै असहजताबीच उत्कृष्ट भिडियो बनाएको ढकालको दाबी छ ।
टेकु खत्रीले छायांकन गरेको उक्त दृश्यको सम्पादन सुर्यकुमार बोहोराले गरेका छन् । यही मन्दिरमा कसम खाइ भन्ने बोलको गीतको भिडियोमा केशब ढकाल, सूर्यकुमार बोहोरा र सानू गैरेको अभिनय रहेको छ ।
