७ वैशाख, काठमाडौं । आज सोमबार केन्द्रीय राजधानी काठमाडौंबाट प्रकाशित अखबारहरुको प्राथमिकतामा एकै विषय नपरेर अलग–अलग परेका छन् । भित्री पृष्ठ सबैखाले सामग्रीहरुले रंगिएका भए पनि पहिलो पृष्ठमा भने राजनीतिकसँगै आर्थिक, खेलकुद, पूर्वाधार निर्माणसँग सम्बन्धित खबर बढी छन् ।
इन्डियन प्रिमियर लिग (र्आइपीएल) का अघिल्ला दुई खेलमा एक–एक विकेट लिएका सन्दीपले आइतबार मुम्बईविरुद्ध तीन विकेट लिएका छन् । राजधानीबाट प्रकाशित सबैजसो अखबारहरुले उनको आइतबारको पफमेन्सलाई ‘चम्किए सन्दीप’, ‘सन्दीपको जादु’ लगायत शीर्षकमा ‘कभरेज’ गरेका छन् ।
नवगठित नेपाल कम्युनिस्ट पार्टी (नेकपा) को केन्द्रीय सदस्य छनोटलाई पनि पत्रपत्रिकाहरुले छुटाएका छैनन् । समाचार अनुसार पूर्वएमाले पक्षले केन्द्रीय सदस्यको नाम टुंगो लगाए पनि तत्कालीन माओवादी केन्द्रलाई सकस परेको छ । प्रचण्डले आफ्नो समूहबाट केन्द्रीय सदस्यका नाम दिन ढिलाइ गर्दा केन्द्रीय समिति विस्तार लम्बिएको समाचारको सार छ ।
यसका अतिरिक्त कामदार ठग्ने ४८ मेनपावर व्यवसायी पक्राउ परेको देखि मैलुङ–स्याफ्रुबेसी सडक खण्डको दोहोरो ट्रयाक खुलेको, २० मन्त्रीले आफ्नो सम्पत्ति विवरण गोप्य राखेकोसम्मका खबरलाई आजका पत्रपत्रिकाहरुले महत्त्वसाथ पस्केका छन् ।
कूटनीतिक राहदानीमा कडाइः कार्यक्रम र जाने देश खुलाए मात्रै दिइने
परराष्ट्र मन्त्रालयले सांसदहरुलाई कूटनीतिक राहदानी (रातो पासपोर्ट) दिन कडाइ गरेको खबर कान्तिपुरले आज छापेको छ ।
संविधान र अघिल्ला प्रतिनिधिसभाका कतिपय सांसदले रातो पासपोर्टको दुरुपयोग गरेको अनुभवका आधारमा परराष्ट्र मन्त्रालयको राहदानी विभागले संसद् सचिवालयलाई पत्राचार गरिएको जानकारी गराएको छ ।
पत्रमा विभागले सचिवालयलाई कुन देश, के कार्यक्रममा जाने भन्ने आधार पेश नगरेसम्म रातो पासपोर्टका लागि सांसदको नाम सिफारिस नगर्न आग्रह गरेको छ ।
भ्रमणको आधार र कागजात पेश नगरी सिफारिस मागेका ७ सांसदलाई सचिवालयले विदेश जाने अनुमति नदिएको कान्तिपुरको समाचारमा उल्लेख छ ।
२० मन्त्रीले लुकाए सम्पत्ति
सरकार गठन भएको सय दिन पुग्न लाग्दा प्रधानमन्त्री केपी शर्मा ओलीसहित २० मन्त्रीले अझै सम्पत्ति सार्वजनिक गरेका छैनन् ।
नेपाल समाचारपत्र लेख्छ– कानुनतः सार्वजनिक पद धारण गरेको ६० दिनभित्र सम्पत्ति विवरण सार्वजनिक गर्नुपर्ने हुन्छ । सार्वजनिक नभए अख्तियार दुरुपयोग अनुसन्धान आयोगद्वारा दण्डित हुने व्यवस्था छ । भ्रष्टाचारमा शून्य सहनशीलताको नीति अख्तियार गरेको सरकार प्रमुखसहितले आफ्नै सम्पत्ति विवरण बुझाउन भने आनाकानी गरिरहेका छन् ।’
मन्त्रिपरिषदका सदस्यमध्ये स्वास्थ्य, विज्ञान तथा प्रविधि मन्त्र गिरिराजमणि पोखरेल र कानून, न्याय तथा संसदीय मामिला मन्त्री शेरबहादुर तामाङले मात्रै आफ्नो सम्पत्ति विवरण सार्वजनिक गरेका छन् ।
मुख्यमन्त्री राउतलाई अमेरिका जान रोक
संघीय सरकारले प्रदेश २ का मुख्यमन्त्री लालबाबु राउतलाई अमेरिका भ्रमणमा रोक लगाएको छ ।
नागरिक दैनिकका अनुसार, मन्त्रिपरिषदको आइतबार बसेको बैठकले मुख्यमन्त्री राउतलाई अमेरिका भ्रमणमा जान अनुमति नदिने निर्णय गरेको हो ।
मुख्यमन्त्री राउतले जनरल कन्भेन्सन अफ मधेसी एसोसिएसन इन अमेरिका नामक कार्यक्रममा भाग लिन जान पाऊँ भनी संघीय सरकारसमक्ष अनुमति मागेका थिए ।
तर सरकारले प्रदेशस्तरमा कानून, बजेट, नीति तथा तर्जुमा गर्न बाँकी रहेको र त्यसका लागि मुख्इमन्त्री आवश्यक पर्ने भन्दै मन्त्रिपरिषद् बैठकले राउतको भ्रमण रोकेको छ ।
सरकार छल्दै छात्रवृत्ति बाँडछन् दूतावास
नेपालमा कार्यरत विदेशी नियोगहरुले सरकारसँग समन्वय नै नगरी आफूखुसी छात्रवृत्ति बाँड्ने गरेका छन् ।
अन्नपूर्ण पोस्ट दैनिकका अनुसार, परराष्ट्र मन्त्रालय हुँदै शिक्षा मन्त्रालयमार्फत छात्रवृत्ति दिनुपर्नेमा दूतावासहरुले आफ्नै तजबिजीमा छात्रवृत्तिको कोटा बाँड्ने गरेका छन् ।
शिक्षा मन्त्रालय छात्रवृत्ति शाखाका अनुसार नेपालमा अवस्थित चार विदेशी दूतावासले मात्र सरकारी माध्यमबाट छात्रवृत्ति प्रदान गर्छन् ।
खाडीको चर्को घामले शुक्रकीटमा ह्रास
खाडीको चर्को गर्मीमा श्रम गर्नेहरुको शुक्रकीटमा ह्रास आएको खबर आज अन्नपूर्ण पोस्ट दैनिकले छापेको छ ।
खाडीबाट फर्कने २० प्रतिशत पुरुषहरुमा शुक्रकीटको गुण र संख्यामा ह्रास आएको परीक्षणहरुले देखाएका छन् ।
समाचार अनुसार कतार, साउदी अरब र मलेसियामा काम गरी फर्केका युवा र तिनका पत्नी परामर्श तथा उपचारका लागि अस्पताल एवं निःसन्तान केन्द्रमा धाउने गरेका छन् ।
‘हरेक प्रजनन योग्य पुरुक्षमा औसत प्रतिमिलिलिटर दुई करोडभन्दा बढी शुक्रकीट हुनुपर्छ’, अन्नपूर्ण लेख्छ– खाडी मुलुकमा काम गरी फर्केका १५ देखि २० प्रतिशत पुरुषमा त्योभन्दा कम संख्यामा शुक्रकीट देखिएको छ ।
र यो पनि– ऋण काढेर ‘स्मार्ट’ विद्यालय
सामुदायिक विद्यालयहरुको भद्रगोल र बिथेति बारबार खबर बनिरहन्छन् । शिक्षकले पठन–पाठन नगराएको देखि पूर्वाधार अभावमा रुमल्लिएका खबर आइरहँदा भक्तपुरको एक सामुदायिक विद्यालयले ऋण काढेर विद्यालयलाई स्माटै बनाएको छ ।
भक्तपुरको चाँगुनारायण–८, थाकलमठस्थित सरस्वती माध्यमिक विद्यालय स्मार्ट बनेको हो ।
राजधानी दैनिकका अनुसार, यो विद्यालयका शिक्षक र विद्यार्थीहरु डिजिटल गेटबाट छिर्छन् र स्मार्ट बोर्डमा पढाउँछन् र पढ्छन् ।
हेर्नुहाेस् पत्रपत्रिकाका फ्रन्टपेज
