बलिउडका निर्माता निर्देशकहरु श्रीमान-श्रीमतीलाई एउटै फिल्ममा हिरो-हिरोइन बनाउन हिच्किचाउने गर्छन् । यसो गर्दा फिल्मप्रति दर्शकहरुको क्रेज घट्ने उनीहरुको सोचाई हुन्छ ।
सायद यही भएर हुनुपर्छ अभिषेक बच्चन र ऐश्वर्या रायले लामो समयदेखि एउटै फिल्ममा अभिनय गर्न पाएनन् । आठ वर्ष अगाडि उनीहरु फिल्म ‘रावण’ मा सँगै काम गरेका थिए । मणि रत्नम निर्देशित यो फिल्म फ्लप भएको थियो । त्यसयता उनीहरुलाई कुनै निर्माताले एकसाथ लिएनन् ।
तर, अब चाँडै उनीहरुलाई एउटै फिल्ममा देख्न सकिने भएको छ । फिल्म ‘गुलाब जामुन’ मा आफूहरुले एकसाथ काम गर्न लागेको ऐश्वर्याले एक अन्तरवार्तामा पुष्टि गरिन् ।
‘हो हामी आठ वर्षपछि सँगै फिल्म खेल्दैछौं र निकै उत्साहित छौं,’ उनले भनिन् ।
ऐश्वर्याका अनुसार उनीहरुलाई यो फिल्मको अफर डेढ वर्ष अगाडि नै आएको थियो । तर, दुवैजना आआफ्नो प्रोजेक्टमा विजी भएकाले स्वीकार्न सकेका थिएनन् । यति बेला ऐश्वर्याको फिल्म ‘फन्ने खाँ’ प्रदर्शनको तयारीमा छ भने अभिषेकको फिल्म ‘मनमर्जिया’ पनि निर्माणको अन्तिम चरणमा छ । त्यसपछि दुवैजना ‘गुलाब जामुन’ मा केन्दि्रत हुनेछन् ।
