११ असोज, काठमाडौं । नेपालबाट वैदेशिक रोजगारीमा जानेहरुमध्ये तीन चौथाई भन्दा बढी अदक्ष कामदार रहेको पाइएको छ । युवा तथा खेलकुद मन्त्रालयले सार्वजनिक गरेको प्रतिवेदनअनुसार कामका लागि विदेश जाने नेपाली युवामध्ये ७५.५ प्रतिशत अदक्ष छन् ।
वैदेशिक रोजगारीमा जाने दक्ष नेपाली युवा जम्मा १.५ प्रतिशतमात्र रहेको बिहीबार आयोजित पत्रकार सम्मेलनमा जानकारी दिइयो । त्यस्तै रोजगारीका लागि बाहृय मुलुक गएका नेपालीहरुमध्ये २३ प्रतिशत अर्धदक्ष छन् ।
वैदेशिक रोजगारीमा जाने धेरैजसो कामदार अदक्ष हुँदा उनीहरुले पाउने सेवा सुविधा कम हुनुका साथै जोखिमपूर्ण काम गर्नुपरेको मन्त्रालयले जनाएको छ ।
युवाहरुमा प्रावधिक शिक्षाको पहुँच नहुँदा उनीहरुले काममा दक्ष हुन नसकेको मन्त्रालयको भनाइ छ । ‘प्राविधिक शिक्षा र तालिम स्वरोजगार र उद्यममुखी समेत हुन सकेको छैन’ मन्त्रालयको प्रतिवेदनमा उल्लेख गरिएको छ, अहिले उपलब्ध तालिमका सीमित अवसरहरुमा समेत लक्षित र सीमान्तकृत तथा विपन्न वर्गको पहुँच पुग्न सकेको छैन ।’
नेपालबाट वर्षेनी चार लाख ५० हजार जना विदेश जाने गरेका छन् । तर गत वर्ष गत वर्ष तीन लाख २३ हजार जना विदेश गएका छन् । मन्त्रालयका अनुसार अध्ययनका लागि बाहृय मुलुक जान स्वीकृति लिने युवा ३९ हजार छन् । हाल ४० लाख भन्दा बढी युवा कामका लागि बाहृय मुलुकमा रहेको प्रतिवेदनमा उल्लेख गरिएको छ ।
पूर्ण बेरोजगार २ प्रतिशत, कृषिमा संलग्न ५० प्रतिशत
नेपालमा २.३ प्रतिशत युवाहरु मात्रै पूर्ण बेरोजगार रहेको युवा तथा खेलकुद मन्त्रालयको तथ्याङ्क छ । मन्त्रालयका अनुसार अर्धवेरोजगार युवाहरु २८.३ प्रतिशत रहेका छन् भने कृषिमा ५०.५ प्रतिशत युवाहरु संलग्न छन् ।
युवा साक्षरता बढ्यो
नेपालमा कूल जनसंख्याको ४०.५३ प्रतिशत जनसंख्या युवाको छ । तीमध्ये करिब ८२ प्रतिशत साक्षर छन् । वि.सं.२०६८ को जनगणना अनुसार ७१ प्रतिशत युवा मात्रै साक्षर थिए । यो अवधीमा युवा साक्षरता ११ प्रतिशतले बढेको युवा तथा खेलकुद मन्त्रालयले जानकारी दिएको हो । १८ प्रतिशत युवा अझै निरक्षर रहेका छन् ।
युवा पत्रकारिता पुरस्कार घोषणा
युवा तथा खेलकुद मन्त्रालयले ५० हजार राशीको युवा पत्रकारिता पुरस्कारको समेत घोषणा गरेको छ ।
हरेक वर्ष एक जनालाई प्रदान गरिने पुरस्कारलाई व्यवस्थित गर्नका लागि युवा पत्रकारिता पुरस्कार कार्यविधि २०७५ समेत तय गरिएको छ । पुरस्कार सिफारिस समितिमा एक संयोजक, एक सदस्य सचिव र ३ सदस्यसहित पाँच जना रहनेछन् ।
