अहिले कोही खानामा नुन र चिल्लोचाप्लो कम गरिरहेका छन् । कोही नियमित रक्तचाप जाँच गराइरहेका छन् । कोही नियमित व्यायाम गर्न थालेका छन् । कोही तनाव नियन्त्रणको वाहाना खोजिरहेका छन् । कोही सन्तुलित जीवनशैलीमा अभ्यस्त हुँदैछन् । किन ?

किनभने उनीहरुको शरीरले ‘हाइ अलर्ट’ जारी गरिसकेको छ । उच्च रक्तचाप, मधुमेह, थाइराइड, दम जस्ता समस्याले ग्रसित बनाउँदैछ ।

त्यसमध्ये यहाँ उच्च रक्तचापको चर्चा गरिएको छ ।

उच्च रक्तचापबारे आधारभूत जानकारी सबैलाई छ । उच्च रक्तचाप तनाव, खराब खानपान, जीवनशैली, कुनै गंभिर शारीरिक समस्या र वंशानुगत कारणले लाग्ने गर्छ । उच्च रक्तचाप नियन्त्रण गर्नु भनेको तनावरहित शान्त रहनुका साथै स्वास्थ्य जीवनशैली र खानपान अंगाल्नु पनि हो । औषधीद्वारा पनि यसलाई नियन्त्रण गरिन्छ ।

उच्च रक्तचाप भइसकेको अवस्थामा यसलाई नियन्त्रण गर्नैपर्छ । यदि बेवास्ता गरिएमा त्यसले शरीरका अरु अंगमा क्षति पुर्‍याउँछ ।

मिगौंला फेल हुन सक्छ

किड्नी अर्थाम मिर्गौलाले हाम्रो रगतबाट दुषित पदार्थहरु अर्थात टक्सिनलाई बाहिर निकालिन्छ । उच्च रक्तचापको कारण किड्नीमा दबाब बढ्छ र कैयौं पटक रक्तनली साँघुरो र मोटो हुन्छ । यस बाहेक किड्नीमा रगत छान्ने कोषहरुलाई पनि यसले प्रभावित बनाइदिन्छ ।

जसकारण मानिसको किड्नीले आफ्नो काम ठिकसँग गर्न सक्दैन र रगतमा दुषित पदार्थ जमिरहन्छ । जसले समस्या बढ्दै गएर किड्नी फेल हुने र अन्य रोग लाग्ने खतरा पनि बढ्छ ।

मुटुरोगको खतरा बढ्छ

उच्च रक्तचापको कारण सबैभन्दा धेरै खतरा हाम्रो मुटुलाई हुन्छ । जब मुटुलाई साँघुरो भइसकेको रक्तनलीको कारण पर्याप्त अक्सिजन मिल्दैन त्यसपछि टाउको दुख्न सुरु हुन्छ । मुटुले राम्रोसँग रगत पम्प गर्न सक्दैन ।

त्यस्तै रक्तनली धेरै साँघुरो भएर यदि रगतको बहाव नै रोकियो भने मानिसलाई हार्ट अट्याक पनि हुन सक्छ ।

मस्तिस्कमा असर

कम उमेरको मानिसलाई उच्च रक्तचापको समस्या स्मरणशक्तिको हिसाबले पनि खतरनाक हुन सकछ । उच्च रक्तचापको समस्या भएका मानिसको स्मरणशक्ति गुम्न पनि सक्छ जसलाई डिमेन्सिया भनिन्छ ।

उच्च रक्तचापको कारण समय बित्दै जाँदा रोगीको मस्तिस्कमा रगतको आपूर्ती कम हुन्छ र मानिसको सोच्ने सम्भिmने शक्ति घट्दै जान्छ ।

उच्च रक्तचापको कारण हिप्पोकेम्पसमा रगतको सञ्चार ठिक प्रकारले नहुने भएकाले कैयौं ससाना स्ट्रोकको आशंका धेरै हुन्छ । यस कारणले उच्च रक्तचापका बिरामीहरुमा स्मरणशक्तिसँग जोडिएका समस्याहरुको खतरा धेरै हुन्छ ।

आँखा पनि प्रभावित हुन्छ

उच्च ब्लडप्रेसरको समस्याले मानिसको आँखालाई पनि प्रभावित बनाउँछ । उच्च रक्तचापको कारण मानिसको आँखाको ज्योती कम हुँदै जान्छ जसले उनीहरु धमिलो देख्न थाल्छन् । यसैले उच्च रक्तचापको समस्या भएका बिरामीलाई चिकित्सकले आँखाको नियमित जाँच गर्ने सल्लाह दिने गर्छन् ।