१४ मंसिर, काठमाडौं । नुवाकोटको ककनीमा भेला गरेका कांग्रेस जिल्ला सभापतिहरुले पार्टी सभापति शेरबहादुर देउवालाई भेटेर विधानबारे सुझाव बुझाएका छन् । तर, देउवाले धन्यवाद दिनुको साटो असन्तुष्टि जनाएको गुनासो सभापतिहरुले गरेका छन् ।
२५/३० जना जिल्ला सभापति शुक्रबार देउवालाई भेट्न पार्टी कार्यालय सानेपा पुगेका थिए । उनीहरुको तर्फबाट काभ्रे सभापति मधु आचार्यले भेलाको निश्कर्ष लिखित रुपमा बुझाउन खोजे ।
त्यस क्रममा उनले आफूहरुको निश्कर्ष सुनाउन खोज्दा देउवाले ‘पढ्नतिर नलाग्नुस्, हातमै दिनुस्’ भनेका थिए । त्यहाँ उपस्थित एक जिल्ला सभापतिले भने, ‘उहाँ बसेको कुर्सीबाट उठ्नु भएन र धन्यवादसमेत भन्नु भएन ।’
देउवाले मुखले केही नभनेको तर, व्यवहारबाट भेला गरेकोमा असन्तुष्टि जनाएको उनीहरुले बताए ।
उनीहरुले विधान मस्यौदा समितिका संयोजक पूर्णबहादुर खड्कालाई पनि ककनी भेलाको निश्कर्ष बुझाएका छन् । विधानबारे केन्द्रीय कार्यसमितिमा छलफल जारी छ ।
कांग्रेसका जिल्ला सभापतिहरुले बुधबार र बिहीबार नुवाकोटको ककनीमा भेला गरी कांग्रेसको विधान र अन्य समसामयिक विषयमा सभापति देउवालाई आफ्नो निश्कर्ष बुझाएका हुन् ।
यो पनि पढ्नुहोस ३८ बुँदे घोषणापत्र जारी गर्दै सकियो कांग्रेस जिल्ला सभापतिको भेला यो पनि पढ्नुहोस कांग्रेस जिल्ला सभापतिहरुको सुझाव : हारेकालाई वरिष्ठ नेता नबनाऔं
