३ पुस, काठमाडौं । साताको पहिलो र दोस्रो दिन लगातार दोहोरो अंकले बढेको सेयर बजार मंगलबार दोहोरो अंकले घटेको छ । मंगलबार सेयर बजार १४ दशमलव ६१ अंकले घटेर १ हजार १ सय ६८ दशमलव १७ मा आईपुगेको हो ।
सेयर बजारका अधिकांश समूहहरु राताम्मे देखिएका छन् । उत्पादनमूलक र अन्य समूह बाहेक सबै परिसूचकहरु ओरालो लागेका छन् । नेप्से परिसूचक घटेपनि कारोबार रकम भने बढेको छ ।
मंगलबार भएको ५ हजार ६ सय ७४ कारोबारबाट १ सय ५९ कम्पनीको १४ लाख ७८ हजार ७ सय २४ कित्ता सेयर किनबेच भएका छन् ।
जसअनुसार ५३ करोड २३ लाख २५ हजार ६ सय ४६ रुपैयाँको कारोबार भएको नेपाल स्टक एक्सचेञ्जले जनाएको छ । सेयर बजार सुधारका लागि लगानीकर्ताहरुको दबाव समूहले आयोजना गरेको आन्दोलन भने जारी छ ।
विगत एक सातादेखि आन्दोलनमा रहेका लगानीकर्ताहरुले सोमबारदेखि पूर्व घोषित कार्यक्रम अनुसार आमरण अनसन शुरु गरेका छन् । सोमबार आमरण अनसनको घोषणसँगै सेयर कारोबार पनि ठप्प बनाउन आहृवान गरिएको थियो ।
सोमबार करिब ४५ मिनेट पछि खुलेको कारोबार दोहोरो अंकले बढेको थियो भने ४३ करोड भन्दा बढीको कारोबार भएको थियो ।