५ पुस, काठमाडौं । नेकपा स्थायी कमिटी सदस्य विष्णु रिमालले पार्टी नेतृत्व आत्मानिन्दक हुन आवश्यक नभएको बताएका छन् ।
केही दिनदेखि जारी नेकपाको स्थायी कमिटी बैठकमा नेताहरुले सरकार र पार्टी नेतृत्वको चर्को आलोचना गर्दै आएका छन् तर, बिहीबार बैठकमा प्रधानमन्त्रीका सल्लाहकारसमेत रहेका स्थायी कमिटी सदस्य रिमालले नेतृत्वको बचाउ गरे ।
‘हनुमानलाई आफ्नो शक्ति थाहा हुँदैन’ भने जस्तै नेकपाका नेताहरुले आफ्नो शक्ति बुझ्न नसकेको उनको टिप्पणी छ । बैठकमा अधिकांश नेताहरु आत्मभत्र्सनाको शैलीमा प्रस्तुत भएको भन्दै उनले यो आवश्यक नभएको बताए । अहिले वर्ग संघर्ष मुख्य भएको र विरोधीहरुले सरकार तथा पार्टी नेतत्वविरुद्ध प्रचार गरिरहेको भन्दै उनले भने, ‘आत्मालोचना राख्नु भनेको आत्मानिन्दक हुनु हो । यस्तो बेलामा आत्मानिन्दक हुन उचित हुँदैन ।’
अहिले सरकार र पार्टी एकतामा संक्रमणकाल रहेको भन्दै उनले यस्तो बेला राम्रा र योग्यहरु बाहिर हुन सक्ने बताए । संक्रमणकालमा ‘रास्कल आउट’ अर्थात ‘खराब मान्छेहरु बाहिर निकाल’ हुन नसक्ने उनको धारणा थियो ।
नेता रिमालले सामाजिक सुरक्षा कार्यक्रम घोषणा नयाँ युग नै भएको बताए । ०५१ सालमा १०० रुपैयाँ मात्र दिएको तर, अहिले यो भन्दा धेरै गरेको भन्दै ०५१ सालको सरकारको मात्र गुणगान गएकोमा असन्तुष्टि जनाएका छन् ।
एक नेता भन्छन्, ‘रिमालजीले अध्यक्षकै तर्फबाट जवाफ दिए जसरी फलानोले यसो भनुभयो, यो गलत छ । फलानाले भनेको ठीक छ भनेर संश्लेषण पनि गर्नुभयो ।’
बैठकमा पम्फा भुसालले अध्यक्षद्वयको प्रतिवेदन मूलतः सही भएको तर, बैठकमा आएका सुझावहरुलाई समेत समेटेर पूर्ण बनाउनुपर्ने धारणा राखिन् । प्रदेश र स्थानीय तहको सरकारलाई प्रभावकारी बनाउन संयन्त्र बनाउनुपर्ने र पार्टीमा सत्तामा हुने र नहुनेबीच समानता कायम गर्नुपर्ने उनले बताइन् ।
आपूर्तिमन्त्री समेत रहेका मातृका यादवले यो ९ महिनामा मातृका पनि भ्रष्टाचारी भन्ने सन्देश गएको र यो आफ्नो जीवनमा पहिलोपटक भएको सुनाएका थिए । उनले पार्टी अध्यक्ष प्रचण्ड निकै उदार भएको र आफ्ना विरोधीहरुलाई समेत अवसर दिने गरेको भन्दै प्रधानमन्त्री ओलीप्रति ब्यंग्य गरेका थिए ।
बिहीबारको स्थायी कमिटी बैठकमा नेताहरु किरण गुरुङ, पेशल खतिवडा, अमृत बोहोरा, लीलामणि पोखरेल र चत्रपाणि खनालले पनि आफ्नो धारणा राखेका छन् ।
