कृतीमाथि निर्माण भएका चलचित्रहरु सफल नभएको उदाहरण नेपाली चलचित्रमा धेरै छ । अर्कोतिर, रिलिज भैरहेका चलचित्रमा दर्शक नआएको पीडा पनि छ । यो पीडाले अहिले चलचित्र ‘समर लभ’का निर्देशक मुस्कान ढकालको मनमा चिसो पसेको छ । सुविन भट्टराइको चर्चित उपन्यासलाई दृश्यमा ढालिएर यो चलचित्र बनाइएको हो । यो चलचित्रका लेखक सुविन भट्टराई भने उपन्यासमा चलचित्र बनेकोमा खुशी देखिएका छन् । उनले भने–‘ ‘मेरो हरेक उपन्यासमा चलचित्र बनोस् भन्ने लाग्छ । ‘समर लभ’मा चलचित्र बन्दा खुशी छु ।’
पुस्तक पढेका हरेक पाठकको दिमागमा आफ्नै खालको दृश्य पनि बनेको छ । त्यसैले दर्शक चलचित्रबाट निकै आशावादी पनि छन् । किताब र चलचित्रमा तुलना गर्नेको जमात पनि निकै छ । धेरै पाठकले चलचित्रका पात्रहरुमाथि औला उठाइरहेका छन् ।
लेखक सुविन भट्टराई पनि चलचित्रका पात्रबाट असन्तुष्ट छन् । उनी भन्छन्,‘केही कलाकारहरुबाट म सन्तुष्ट छु तर, केही कलाकारबाट म निकै असन्तुष्ट पनि छु ।’ उनी आफूले किताबमा लेखेको पात्र जस्तै पात्र चलचित्रमा भइदिएको भए सुनमा सुगन्ध हुने बताउँछन् ।
सुविनले पूरा चलचित्र हेर्नु अघि चलचित्रको गीत र ट्रेलर हेरेर निर्माण युनिटलाई ‘यो भएन, त्यो भएन’ भनेर गाली गरिरहेका थिए । तर, जब उनले चलचित्र हेरे त्यसपश्चात् उनी चलचित्रबाट सन्तुष्ट छन् । सुविन भन्छन्, ‘चलचित्र नहेर्दा त बिगारे कि भन्ने लागेको थियो । तर, चलचित्र हेरेपछि म उहाँहरु प्रति निकै सन्तुष्ट भए ।’
सुविन चलचित्रले उपन्यासको चर्चालाई छुने दावी गर्छन् । उनी भन्छन्, ‘पुरा उपन्यास साढे २ घण्टाको चलचित्रमा अटाउन गाह्रो हुने रहेछ । तर चलचित्रको उपन्यासको मर्मलाई मर्न दिएको छैन ।’ चलचित्रमा इन्गेजिङ, इन्टरटेनिङ र इमोशन तीनवटै भएको सुविनको भनाई छ ।
उपन्यास पढेका दर्शकले चलचित्र र किताबलाई तुलना गर्ने कुराले लेखक र निर्देशक दुबैलाई निकै तनाब भइरहेको छ । सुविन भन्छन्, ‘यदि उपन्यास नपढेका दर्शक चलचित्र हेर्न जानुभयो भने पूर्ण मनोरञ्जन लिनुहुनेछ ।’
निर्देशक मुस्कान ढकाल ‘समर लभ’ चलचित्र निर्माण गर्न निकै गाह्रो भएको बताउँछन् । ‘हिट उपन्यासमा चलचित्र निर्माण गर्दा निकै गाह्रो हुने रहेछ’, निर्देशक ढकालले भने, ‘सबैको दिमागमा रहेको कुरालाई दृश्यको माध्यमबाट पुरा गर्नु आफैमा चुनौती हो, ढकालले भने ।
निर्देशक मुस्कानले ‘समर लभ’ क्याजुअल स्टोरी भएको कारण चलचित्र निर्माणमा आट गरेको बताए । उनले भने, ’उपन्यासहरु धेरै छन् । तर, मैले समर लभ छान्नुको मुख्य कारण भनेको यसमा भएको क्याजुअल कुराहरु नै हो । यहाँ नेपाल यातायात छ, नयाँ बानेश्वर छ, टीयु छ । यी सब कुरा भएपछि चलचित्र निर्माण गर्न सजिलो हुने देखेर नै यसमा हात हालेको हुँ ।’
सुविन र मुस्कान मिलेर अर्को चलचित्रमा पनि सहकार्य गर्ने तयारीमा छन् । सुविनको अर्को चर्चित उपन्यास ’साया’को पनि मुस्कानले निर्देशन गर्ने तयारी गरेका छन् । ‘यदि समर लभ सफल भएछ भने हामी साया पनि बनाउने तयारीमा छौँ’, मुस्कानले भने, ’तर, समर लभले सफलता पाएन भने अर्को जोखिम उठाउने कुरा हुन्न ।’
