Comments Add Comment

को हुन् ताप्लेजुङ दुर्घटनामा परेका सुरक्षाकर्मी अर्जुन घिमिरे ?

Photo Credit : घिमिरेको फेसबुकबाट ।

१५ फागुन, काठमाडौं । बुधबार दिउँसो ताप्लेजुङमा भएको हेलिकोप्टर दुर्घटनामा संस्कृति, पर्यटन तथा नागरिक उड्डयान मन्त्री रविन्द्र अधिकारीसहित ७ जनाको मृत्यु भएको छ ।

ज्यान गुमाउनेमा मन्त्री अधिकारीका पर्सनल सेक्यूरिटी अफिसर (पीएसओ) अर्जुन घिमिरे पनि छन् ।

सैनिक मुख्यालय जंगी अड्डाको अभिलेख अनुसार उनी २०५८ सालमा नेपाली सेनाको सेवामा प्रवेश गरेका थिए । उनी १० भदौदेखि मन्त्री अधिकारीको गार्ड कमाण्डर भएर खटिएको सैनिक प्रवक्ता यामप्रसाद ढकालले अनलाइनखबरलाई बताए ।

हाल घिमिरे सेनाको जमदार पदमा कार्यरत् थिए ।

यो पनि पढ्नुहोस ताप्लेजुङमा हेलिकोप्टर दुर्घटना : पर्यटनमन्त्री अधिकारीसहित ७ जनाको निधन

एक वर्षअघि मात्रै बुबाको निधन

०३९ सालमा जन्मिएका घिमिरेको स्थायी घर रामेछापको साबिक गुम्देल गाविस–७, हाल उमाकुण्ठ गाउँपालिका–१ मा छ । केहीवर्ष अघि सेनाको शान्ति मिसनमा गएर उनले कीर्तिपुरमा घर पनि बनाएका थिए ।

हाल कीर्तिपुरस्थित घरमा उनकी श्रीमती शैलु घिमिरे र १० वर्षीय छोरा असिम घिमिरे छन् । उनी स्थानीय विद्यालयमा अध्ययनरत् छन् ।

घिमिरेका आफन्त सञ्चारकर्मी समेत रहेका टपेन्द्र कार्कीका अनुसार उनको बुबा उद्योगबहादुर घिमिरेको निधन भएको एक वर्ष पनि पुगेको छैन । ‘उनको बुबाआमा दुवै जना खेती किसानी गर्नु हुन्थ्यो । सामान्य परिवार हो’, कार्कीले अनलाइनखबरसँग भने, ‘आमा चाहिँ गाउँमै हुनुहुन्थ्यो । अहिले काठमाडौं आउन लाग्नु भएको छ ।’

यो पनि पढ्नुहोस खराब मौसमका कारण हेलिकोप्टर दुर्घटना : गृहमन्त्रालय

घिमिरे परिवारको जेठो छोरा भएको कार्कीको भनाइ छ । ५ जना छोराछोरी मध्ये ३ बहिनीहरुको विवाह भइसकेको छ भने अर्का छोरा भिमसेन घिमिरे पनि नेपाली सेनामै कार्यरत् छन् ।

‘ऊ सबैलाई माया र आदर गर्ने स्वभावको थियो । अन्तरमुखी खाल्को पनि थियो, धेरै बोल्दैनथ्यो’, कार्की भन्छन् ।

घिमिरेले डिप्लोमा तहसम्मको पढाइ सकेका छन् । उनले ठमेलस्थित सरस्वती बहुमुखी क्याम्पसमा पढेका थिए । प्रारम्भिक शिक्षा भने जनसेवा माविबाट लिएका थिए भने एसएलसी हिममगंगा मावि, सोलुखुम्बुबाट दिएका थिए ।

कार्कीका अनुसार उनको घरबाट विद्यालय पुग्न करिब दुई घन्टा लाग्थ्यो । ‘उसको पढाइ भने औसत थियो’, कार्की भन्छन् ।

यो खबर पढेर तपाईलाई कस्तो महसुस भयो ?

ट्रेन्डिङ

Advertisment