१९ चैत, काठमाडौं । आर्सनलले इंग्लिस प्रिमियर लिग फुटबलमा न्युक्यासललाई पराजित गरेको छ । सोमबार राति आफ्नै मैदानमा भएको खेलमा आर्सनलले न्युक्यासललाई २-० गोलअन्तरले पराजित गरेको हो । आर्सनलको जितमा आरोन रमसी र एलेक्जेन्डर लेकाजेटले गोल गरे ।
खेलको ३० औं मिनेटमा रमसीले गोल गर्दै आर्सनललाई अग्रता दिलाएका थिए । उनकै गोलमा आर्सनलले पहिलो हाफसम्ममा १-० गोलको अग्रता बनाएको थियो । खेलको दोस्रो हाफमा आर्सनलले अर्को गोल थप्दै जित हात पारेको हो ।
खेलको ८३ औं मिनेटमा आर्सनलले लेकाजेटको गोलबाट २-० गोलको जित हात पारेको हो ।
यो जितसँगै आर्सनल लिगको तेस्रो स्थानमा उक्लिएको छ । आर्सनलले टोटनहृयामलाई पछि पार्दै तेस्रो स्थानमा पुगेको हो । आर्सनलको ३१ खेलबाट ६३ अंक रहेको छ । यता, चौथो स्थानमा रहेको टोटनहृयामको भने समान खेलबाट ६१ अंक रहेको छ ।
लिगको शीर्ष स्थानमा भने लिभरपुल रहेको छ । लिभरपुलको ३२ खेलबाट ७९ अंक रहेको छ । लिगको दोस्रो स्थानमा रहेको डिफेन्डिङ च्याम्पियन म्यान्चेस्टर सिटीको भने ३१ खेलबाट ७७ अंक छ ।
