युएई । ल्यूकिमिया ब्लड क्यान्सरले थलिएर दुबई अस्पतालमा उपचाररत काभ्रेकी कमला गिरीको स्वास्थ्य अवस्थाबारे नेपाली दूतावास युएईले जानकारी लिएको छ ।

दूतावासका उपनियोग प्रमुख सागरप्रसाद फुयाँल र जनसम्पर्क अधिकृत (पीआरओ) इरफान आलमले बुधबार अस्पतलामा पुगेर उनको स्वास्थ्य अवस्थाबारे जानकारी लिएका हुन् ।

कमलाका श्रीमान बिमल गिरीले दूतावासका प्रतिनिधिलाई उनको स्वास्थ्यमा भइरहेको सुधार र उपचारका बारेमा जानकारी गराए । उनले श्रीमतीको हालसम्मको उपचारमा लागेको सम्पूर्ण खर्च छुट गरिदिनसमेत फुयाँलसँग आग्रह गरे ।

अनलाइनखबरसँगको कुराकानीमा गिरीले भने, ‘दूतावासबाट सरहरु आउनुभयो । अब केहीँ आशा पलाएको छ । उनको स्वास्थ्यमा पनि सुधार हुँदैछ । तर, थप उपचारमा समस्या छ । साथीभाइको सहयोगमा अहिले नियमित औषधि त खुवाउँदै छु । यतिका रकम मैले तिर्न सक्ने अवस्था छैन । उपचारमा लागेको खर्च छुटका लागि दूतावासले पहल गरिदियोस् ।’

कमलाको उपचारमा हालसम्म चार लाख दिराम (एक करोड २० लाख बढी) खर्च भइसकेकोे छ ।

उनको कुरा छेउमै रहेर सुनिरहेका उपनियोग प्रमुख फुयाँलले अभिभावकत्व दर्शाउँदै विमललाई मनोबल उच्च राख्न आग्रह गरेका छन् । उपचार खर्च मिनाहा गराउन दूतावासले पहल थालेको उनले जनाए ।

उपचार खर्च मिनाह गरिदिन अस्पताललाई आग्रह

बिमारीको परिवारको आर्थिक अवस्थाबारे अस्पताललाई अवगत गराउँदै उपचारमा लागेको खर्च छुट गरिदिन दूतावासले पत्रमार्फत आग्रह गरेको थियोे । तर, दूतावासबाट आधिकारिक प्रतिनिधि आउनुपर्ने जनाउँदै अस्पतालले पत्र बुझ्न मानेको थिएन ।

बुधबार दूतावासको टोलीले कमलाको उपचारमा संलग्न चिकित्सक र अस्पताल प्रशासनसँग समेत भेट गरेको छ ।

यो पनि पढ्नुहोस ब्लड क्यान्सरले थलिएकी कमला २ महिनादेखि दुबई अस्पतालको बेडमा

अस्पताल प्रशासनसँको भेटमा उपनियोग प्रमुख फुयाँलले बिमारीको परिवारको आर्थिक अवस्था कमजोर रहेको जनाउँदै उपचार खर्च मिनाहा गरिदिन आग्रह गरेका छन् । तर, सबै रकम मिनाहा गर्ने सवालमा अस्पताल प्रशासनले माथिल्लो निकायमा जानकारी गराउनुपर्ने र त्यहाँबाट मात्र निर्णय गर्न सकिने जनाएको छ ।

अस्पताल संचालक युएई बाहिर रहेको र उनी आएपछि थप पहल गरिने फुयाँलले जानकारी दिए ।

केमो गराउन आर्थिक समस्या

कमलालाई अझै ६ साता अस्पतालमै राख्नुपर्ने चिकित्सकले बताएका छन् । उनको ३ वटा केमो गराइसकेको र आगामी साता चौथोँ केमो गराउनुपर्ने उनीहरुले सुझाएका छन् ।

एकपटकको केमो गराउदाँ ७ हजार दिराम अर्थात २१ हजार रुपैयाँ खर्च लाग्छ । केमो गराउनसमेत आर्थिक समस्या भएकाले विमलले सबैसँग सहयोगको अपिल गरिरहेका छन् ।

उनको उपचारमा सहयोग गर्न युएईमा रहेका नेपाली संघसंस्था तथा व्यक्तिहरुले तदारुकता देखाएका छन् ।

गैरआवासीय नेपाली संघ र नेपाली समाजका प्रमुखले बिमारी र उनका आफन्तलाई भेट गरी सहयोग गर्ने जनाएका छन् ।

यस्तै अबुधाबीमा गायक प्रकाश पौडेलको पहलमा सहयोग संकलन भइरहेको छ ।