२५ चैत, काठमाडौं । आर्सनल इंग्लिस प्रिमियर लिग फुटबलमा एभर्टनसँग पराजित भएको छ । यो हारसँगै तेस्रो स्थानमा उक्लिने अवसर आर्सनलले गुमाएको छ ।
आइतबार राति भएको खेलमा आर्सनल एभर्टनसँग उसैको मैदानमा १-० गोलले स्तब्ध बनेको हो । एभर्टनको जितमा फिल जगिएल्काले निर्णायक गोल गरे ।
खेलको १०औं मिनेटमा नै जगिएल्काले गोल गरेपछि एभर्टनले १-० गोलको अग्रता बनाएको थियो । खेलको सुरुवाती समयमै अग्रता लिएको एभर्टनले अन्तिम समयसम्म पनि आफ्नो अग्रतालाई कायमै राख्न सफल भयो ।
खेल अवधिभर आर्सनलले बल पकड आफ्नो पक्षमा पारेपनि गोल गर्न भने सकेन ।
लिगको चौथो स्थानमा रहेको आर्सनलको ३२ खेलबाट ६३ अंक छ । तेस्रो स्थानमा रहेको टोटनहृयामको समान खेलबाट ६४ अंक छ ।
लिगको शीर्ष स्थानमा भने लिभरपुल छ । लिभरपुलको ३३ खेलबाट ८२ अंक छ । दोस्रो स्थानको म्यानचेस्टर सिटीको भने ३२ खेलबाट ८० अंक छ । आर्सनलमाथि विजयी हात पारेको एभर्टन भने ४६ अंक बनाएर लिगको नवौं स्थानमा छ ।
