१३ जेठ, काठमाडौं । विभागीय टिम एपीएफ क्लबले प्रधानमन्त्री कप क्रिकेट प्रतियोगितामा लगातार दोस्रो जित हात पारेको छ ।
टियु क्रिकेट मैदानमा आज (सोमबार) भएको खेलमा एपीएफले सुदूरपश्चिम प्रदेशलाई तीन विकेटले पराजित गरेको हो । १२६ रनको सामान्य चुनौती पछ्याएको एपीएफले ३४.४ ओभरमा सात विकेटको क्षतिमा लक्ष्य भेटायो ।
एपीएफका लागि कप्तान पृथु बास्कोटाले अविजित ३२ रन बनाए । त्यस्तै, ओपनर शरद भेषवाकरले २६, सन्दीप जोराले २२ र सुमित महर्जनले १५ रन बनाए । बलिङतर्फ सुदूरपश्चिमका विनोद लामाले तीन र शेर मल्लले दुई विकेट लिए ।
यसअघि टस जितेर पहिले ब्याटिङ गरेको सुदूरपश्चिम प्रदेशले ३७.१ ओभरमा सबै विकेटको क्षतिमा १२५ रन मात्रै बनाएको थियो । ओपनिङ मध्यम भए पनि सुदूरपश्चिमले ठूलो स्कोर भने बनाउन सकेन । लोकेश बमले ३० र विपिन रावलले २१ रन बनाउन बाहेक अन्य ब्याट्सम्यानले राम्रो रन बनाएनन् । एपीएफका लागि अविनाश बोहराले दुई विकेट लिए ।
