१२ साउन, काठमाडौं ।विदेशबाट आयात गरिने पुस्तकमा दश प्रतिशत भन्सार महशुल लगाउने सरकारी निर्णयलाई व्यवसायीले नमान्दा मुख्य भन्सार नाकाहरुमा करोडौं मूल्यका पुस्तकहरु रोकिएका छन् । बजारमा पुस्तकको ‘हाहाकार मच्चिएको’ तर भन्सारमा रोकिएर पुस्तक बिग्रिन थालेको भन्दै व्यवसायीहरुले सरकारलाई दवाव दिएका छन् ।
नेपाल राष्ट्रिय पुस्कत बिक्रेता संघका अध्यक्ष लिखत पाण्डेका अनुसार व्यवसायीले खरिद गरेर ल्याएका पुस्तक भन्सारका रोकिँदा बजारमा केही पुस्तकको कालोबजारीसमेत सुरु भएको छ । क्याम्ब्रीज पब्लिकेशनले प्रकाशित गर्ने कक्षा ११ को मिनिङ इनटु वर्ड किताबको फोटाकपी गरेर नेपालमा बिक्रि थालिएको अध्यक्ष पाण्डेले दावी गरे ।
सक्कली किताब भन्सारमा रोकिने अनि फोटोकपी बालबालिकाले पढ्ने वातावरण बनाएर सरकारले देशलाई लज्जित बनाएको पाण्डेको आरोप छ । पुस्तक व्यवसायीहरुका अनुसार चिकित्सा शिक्षा, इन्जिनियरिङ, कक्षा ११ र १२ तथा स्नातकोत्तर तहको पाठ्यपुस्तक बजारमा अभाव भएको छ ।
नेपालमा आयात हुने पुस्तकको ठूलो हिस्सा ओगट्ने स्काई रोड ट्रान्सपोर्टेसनका अनुसार उनीहरुले आयात गरेका ४ ट्रक पुस्तक भन्सारमा रोकिएका छन् । झण्डै १५ सय बण्डल त्यस्ता पुस्तक रक्सौलको भारतीय भन्सारमा नै रहेको म्यमनेजर अनिल श्रेष्ठले बताए । यस्तै सुगम परिबहनका पनि २ हजार बण्डल किताब सुनौली भन्सारमा रोकिएका छन् । रोकिएका पुस्तकको सरदर मूल्य ७ करोड हाराहारी हुने व्यवसायीको दावी छ ।
अर्थमन्त्रीले भेट्न दिएनन्
भन्सारमा रोएकिो पुस्तक बढेको महशुल नतिरी छुटाउन व्यवसायीले गरेको लबिङलाई भने अर्थमन्त्री डा.युवराज खतिवडाले अस्वीकार गरेका छन् । बिभिन्न च्यानल मार्फत अर्थमन्त्रीलाई भेटेर प्रभावमा पार्न व्यवसायीले कसरत गरे पनि अर्थमन्त्रीले उनीहरुलाई भेट गर्न समय नै नदिएको अर्थमन्त्री निकट स्रोतले अनलाईनखबरलाई बतायो ।
नेपाल राष्ट्रिय पुस्कत बिक्रेता संघका अध्यक्ष लिखत पाण्डेले अर्थमन्त्रीले आफूहरुलाई भेट नदिएको स्वीकार गरे । भन्सार बिन्दुमा आईपुगेका पुस्तक राजनीतिक लबिङका आधारमा नेपाल भित्र्याउन नपाए भारतीय पाटीलाई नै फिर्ता पठाउने विषयमा पनि संघमा छलफल भई रहेको संघका एक पदाधिकारीले बताए ।
