डोटीमा विप्लव समूहले भन्यो : वडा कार्यालय हामीले जलाएका होइनौं

२० साउन, डोटी । विप्लव समूहले डोटीमा वडा कार्यालयहरुमा भएको आगजनीमा आफ्नो संलग्नता नरहेको बताएको छ ।

सो पार्टीको डोटी जिल्ला समितिले एक विज्ञप्ति जारी गर्दै जनप्रतिनिधिहरु स्वयंको संलग्नतामा आगो लगाइएको दावी गरेको छ ।

शिखर नगरपालिका–७ को वडा कार्यालयमा वडाध्यक्ष नरबहादुर बलायरले आगो लगाउन लगाएको आरोप विज्ञप्तिमार्फत लगाइएको छ । नेकपा डोटीका इन्चार्ज दौलत र सेक्रेटरी कालु पाण्डेद्वारा हस्ताक्षरित विज्ञप्तिमा आफ्नो कर्तुतमाथि पर्दा हाल्न वडाध्यक्षले आफूहरुलाई दोष देखाएको आरोप लगाइएको छ ।

साउन ११ गते राति करीव ११ वजे उक्त वडा कार्यालयमा आगजनी भएको थियो । आगजनी भएको भोलिपल्ट वडाध्यक्ष बलायरले आगजनीमा बिप्लव समूहका कार्यकर्ता दीर्घसिं कुँवरको संलग्नता रहेको प्रहरीलाई जानकारी दिएका थिए ।

यस्तै साउन ७ गते जोरायल गाउँपालिका–४ को वडा कार्यालयमा भएको आगजनीमा पनि पार्टीको कुनै संलग्नता नभएको विप्लव समूहले विज्ञप्तिमा उल्लेख गरेको छ ।

जेठ १४ गते बडीकेदार गाउँपालिका–४ को कार्यालयमा गरिएको आगजनीमा पनि आफूहरुको संलग्नता नरहेको बिप्लव समूहको एक जिल्ला नेताले जानकारी दिए ।

एनसेल टावर जलाउने बिप्लव समूह

वडा कार्यालयहरुमा आगजनी नगरेको विप्लव समूहले डोटीको एनसेलका दुई टावरमा गरिएको आगजनीमा भने संलग्नता स्वीकार गरेको छ ।

‘जोरायल गाउँपालिका–१ घण्टेश्वरमा रहेको टावरमा पार्टीको डडेल्धुरा कमिटीले गरेको हो’ उक्त समूहका एक नेताले भने ‘शिखर नगरपालिका–१ मा रहेको टावरमा डोटी पार्टीले आगजनी गरेको हो ।’