२१ साउन, काठमाडौं । चाबहिल–चुच्चेपाटी खडकखण्डका स्थानीयवासी पुनः आन्दोलित बनेका छन् ।
सडक निर्माण थालिएको लामो समय बितिसक्दा पनि कालोपत्रे नगरेको भन्दै बौद्धवासी आन्दोलित भएका हुन् ।
स्थानीयवासी र व्यवसायीले यो पटक ढल निर्माण गनुैपर्ने माग राखेका छन् । मंगलबार बिहान उनीहरुले केही घन्टा यातायात समेत अबरुद्ध पारे ।
‘ढलको पानी घरभित्रै पस्ने समस्या छ । पिच पनि अहिलेसम्म भएको छैन’, एक स्थानीयले भने ।
यसअघि २६ वैशाखमा पनि सडक कालोपत्रे गर्न माग गर्दै भएको प्रदर्शनका क्रममा प्रहरी र स्थानीयबीच झडप भएको थियो । तत्काल सडक मर्मत गर्ने सहमतिपछि आन्दोलन मत्थर पारिएको थियो ।
वडा कार्यालयमा सहमति
मंगलबार वडा नं. ७ को कार्यालयमा फेरि उस्तै प्रकृतिको सहमति भएको छ ।
महानगरीय प्रहरी वृत्त, बौद्धका डीएसपी नरेन्द्र चन्द भन्छन्, ‘तत्काल डोजर लगाएर ढलको समस्या हल गर्ने सहमति भएको छ ।’
कालोपत्रे चाहिँ वर्षातका कारण अहिले हुन नसक्ने भनिएको छ । वर्षाको समयपछि कालोपत्रे थाल्ने सहमति भएको बताइएको छ ।
