११ भाद्र, विराटनगर । प्रदेश–१ को प्रदेशसभा बैठकले प्रदेश स्वायत्त संस्था गठन सम्बन्धमा बनेको विधेयक २०७६ पारित गरेको छ ।
आन्तरिक मामिला तथा कानुनमन्त्री हिक्मत कार्कीले प्रतिवेदनसहितको पेश गरेको उक्त विधेयक प्रदेश सभाको बुधबार बसेको बैठकले सर्बसम्वत पारित गरेको हो ।
प्रदेश सभा बैठकले प्रदेश स्वायत्त संस्था गठन सम्बन्धकमा बनेको विधेयक २०७६ लाई दफावार छलफलमा लागि न्याय प्रशासन तथा विधायन समितिमा पठाइएको थियो ।
मन्त्री कार्कीले प्रतिवेदनसहितको विधेयकमाथिको छलफल गरियोस भनी बैठकमा प्रस्ताव पेश गरेका थिए ।
विधेयकमाथिको छलफलमा भाग लिँदै सत्तापक्षका सांसद श्रीप्रसाद मैनालीले समर्थन जनाएका थिए । लगतै विधेयक सर्वसम्मत पारित भएको थियो ।
विधेयक पारित भएसँगै प्रदेश सरकारले प्रदेशको स्वायत्त संस्था तथा निकाय गठन गर्ने बाटो खुलेको छ ।
प्रदेशमा गठन हुने आम सञ्चार प्रतिष्ठान, पर्यटन प्रतिष्ठान जस्ता स्वायत्त संस्था तथा संरचनाको छुट्टा छुट्टै कानुन बनाउनु पर्ने अवस्था अन्त्य समेत हुनेछ ।