९ कात्तिक, रोल्पा । उपराष्ट्रपति नन्दबहादुर पुन ‘पासाङ’ तिहार पर्व मनाउन आफ्नो पुर्ख्यौली घर रोल्पा आएका छन् । उनको घर रोल्पाको परिवर्तन गाउँपालिका-२ राङ्सीको डाँडागाउँ हो ।
पहिलो कार्यकाल उपराष्ट्रपति भएको बेला घर आएका पुनको दोस्रो कार्यकाल पछिको यो पहिलो आगमन हो । उपराष्ट्रपति पुनले तिहारमा दिदीबहिनीको हातबाट टीका ग्रहण गर्ने उनका भाइ भीमप्रकाश पुनले जानकारी दिए ।
उनले गत वर्षको तिहारमा आफ्नो एकमात्र दिदीको हातबाट टीका लगाउन पाएका थिएनन् । गत वर्ष उनलाई काठमाडौंमै चन्द्रमाया पुन, शोभा पुन, विमला पुन र शशी लामाले भाइटीका लगाइदिएका थिए ।
उपराष्ट्रपति पुनलाई रोल्पालीहरुले झाँकी तथा बाजागाजासहित स्वागतसमेत गरेका छन् ।
रोल्पा आएको मौकामा उनी गाउँपालिका स्तरमा हुने विभिन्न कार्यक्रममा सरिक हुने कार्यतालिका तय भएको वडाध्यक्ष हरिप्रसाद बुढाले जानकारी दिए ।
