तिहारको बेला बिभिन्न दुर्घटना हुँदा प्रदेश १ मा २९ जनाको मृत्यु

१५ कात्तिक, विराटनगर । तिहारको अवधिमा विभिन्न घटनामा परी प्रदेश १ मा २९ जनाको मृत्यु भएको छ ।

प्रदेश प्रहरी कार्यालय विराटनगरका प्रवक्ता एसएसपी शेखर कोइरालाका अनुसार सवारी दुर्घटना, आगलागी, झगडा, आत्महत्यालगायत घटनाका कारण २९ जनाको मृत्यु भएको हो ।

तिहारको अवधिमा प्रदेश १ मा ४१ वटा सवारी दुर्घटना भएका छन् । जसका कारण ६ जनाको मृत्यु भएको छ भने ५३ जना घाइते भएका छन् ।

तिहारको चार दिनको अवधिमा प्रदेश १ का विभिन्न जिल्लाहरुमा १४ जनाले आत्महत्या गरेका छन् । आत्महत्या प्रयास गर्ने १६ जनाको उद्धार गरिएको छ ।

प्रहरीका अनुसार यो अवधिमा ४ जनाको लडेर मृत्यु भएको छ ।

मादक पदार्थ सेवन गरी कुटपिट हुँदा १ जनाको मृत्यु भएको छ भने २० जना घाइते भएका छन् ।

दीपावलीको अवधिमा १५ घरमा आगलागी हुँदा एक करोड ८७ लाख बराबरको क्षति भएको छ । आगलागीमा परी दुई जनाको मृत्यु भएको छ ।

अत्याधिक मादक पदार्थ सेवनका कारण १ जनाको मृत्यु भएको छ । एक जनाको डुबेर मृत्य भएको छ भने नदीले बगाउँदा एकजना बेपत्ता भएका छन् ।

५८ जुवाडे पक्राउ

प्रहरीले जुवा खेल्ने र खेलाउने ५८ जना जुवाडेलाई पक्राउ गरेको छ । जुवा खालबाट ३० बुक तास, १६ थान कौडा र ८ लाख ४३ हजार ५ सय ८२ रुपैयाँ नगद बरामद गरेको छ ।

दीपावलीभर एक लाख १८ हजार बराबरको पटका र पटका ओसार पसारमा संग्लग्न २ जनालाई नियन्त्रणमा लिएको छ ।

तिहारको अवधिमा सुनसरीको धरानमा घरेलु हतियार देखाएर लुटपाट गर्न खोज्ने ५ जनालाई हतियारसहित पक्राउ गरेको छ ।