२२ मंसिर, काठमाडौं । संस्कृति, पर्यटन तथा नागरिक उड्डयन मन्त्री योगेश भट्टराईले पदभार ग्रहण लगत्तै घोषणा गरेअनुसार जेष्ठ नागरिकलाई हवाई भाडामा ५० प्रतिशत छुट दिन सरकारद्धारा गठित कार्यदलले सिफारिस गरेको छ ।

यो पनि पढ्नुहोस ७० वर्ष माथिका ज्येष्ठ नागरिकलाई हवाई भाडामा ५० प्रतिशत छुट

हवाई क्षेत्रका विविधि विषयमा सुझाव दिन सरकारले गठन गरेको कार्यदलले जेष्ठ नागरिकलाई हवाई भाडामा छुट दिँदा राज्यलाई ठूलो व्ययभार नपर्ने निष्कर्ष निकालेको हो ।

मन्त्रीको घोषणालगत्तै नेपाल एयरलाइन्सले ७० वर्षभन्दा माथिका जेष्ठ नागरिकलाई आन्तरिक हवाई भाडामा छुट दिन थालेको थियो । श्री एयरलाइन्सले ८५ वर्षमाथिका जेष्ठ नागरिकलाई मात्र ५ सय रुपैयाँ भाडामा उडाउने घोषणा गरेको थियो । ७५ वर्षभन्दा माथिका जेष्ठ नागरिकलाई छुट दिने उसले जनाएको छ ।

तर, अन्य वायुसेवा कम्पनीहरुले भने मन्त्रालयमा लिखित र मौखिक रुपमा यस घोषणाको विरोध गरेका थिए । पछि कम्पनीहरु आफूलाई विपन्न स्वघोषणा गर्ने जेष्ठ नागरिकलाई छुट दिन तयार भए ।

यो पनि पढ्नुहोस विपन्‍न जेष्ठ नागरिकलाई घटस्थापनादेखि हवाई भाडामा छुट

एक महिनामा ४ सय ८१ लाभान्वित

कार्यदलले एक महिना अवधिको तथ्याङ्क लिएर हवाई यात्रुको विश्लेषण गरेको छ । २ असोज २०७६ देखि १ महिना अवधिमा आन्तरिक विमानस्थलमा उडान भर्ने वायुसेवा कम्पनीको तथ्याङ्क कार्यदलले निकालेको थियो ।

त्यसअनुसार एक महिनामा कूल ३ लाख ३३ हजार ८ सय ४ हवाई यात्रुले आन्तरिक उडानमा यात्रा गरेका छन् । त्यसमध्ये मात्र ४ सय ८१ जना यात्रु ७० वर्ष नाघेका जेष्ठ नागरिक थिए । यात्रु संख्याको आधारमा एक महिनामा सबैभन्दा बढी आन्तरिकमा बुद्ध एयर, यती एयरलाइन्स र श्री एयरलाइन्सले मान्छे बोक्छन् । कूल हवाई यात्रुको संख्यामध्ये मात्र ०.१४ प्रतिशत यात्रु जेष्ठ नागरिक रहेको भन्दै कार्यदलले छुट दिने निर्णय कार्यान्वयनबाट राज्यलाई ठूलो भार नपर्ने निष्कर्ष निकालेको हो ।

कार्यदलले सबैभन्दा व्यस्त (चाडबाड)को मौसममा उडेका यात्रुको संख्या लिएर तथ्याङ्क विश्लेषण गरेको थियो । त्यसका लागि कार्यदलले ४ वटा विमानस्थलबाट बुद्ध एयर, यति एयरलाइन्स, श्री एयरलाइन्स, नेपाल एयरलाइन्स, सिम्रिक एयरलाइन्स र सौर्य एयरलाइन्सले बोकेका यात्रुको संख्या विश्लेषण गरिएको थियो । त्यसअनुसार ४ विमानस्थलमा एक दिनमा १ हजार ६ सय ९० यात्रुले सेवा लिएकोमा ७० वर्ष नाघेका यात्रु मात्र ७९ जना रहेका थिए ।

यस्तो छ कार्यदलको सिफारिस

पर्यटन मन्त्रालयको प्रमुख प्राथमिकताका कार्यक्रममा घोषणा गरिएको जेष्ठ नागरिकलाई हवाई भाडामा ५० प्रतिशत छुट दिने नीतिप्रति वायुसेवा सञ्चालक संघले असहमति जनाएको छ । कम्पनीको तर्फबाट त्यस्तो छुट दिन नसकिने भनि उसले लिखित तथा मौखिक जानकारी गराएपछि मन्त्रीको घोषणा कार्यान्वयनमा आशंका उब्जेको छ ।

नेपालको राष्ट्रिय जनगणना २०६८ अनुसार ७० वर्ष र सोभन्दा माथिका जेष्ठ नागरिकको संख्या कुल जनसंख्याको ३.३१ प्रतिशत रहेको छ । ७५ वर्ष र सोभन्दा माथिको नागरिकको संख्या १.७ प्रतिशत रहेको छ । २ असोज २०७६ मा बुद्ध एयर, यति एयरलाइन्स, श्री एयरलाइन्स, सिम्रिक एयरलाइन्स र सौर्य एयरलाइन्सबाट नेपालगन्ज, पोखरा, भरतपुर र चन्द्रगढी विमानस्थल प्रयोग गरी १ हजार ६ सय ९० जनाले यात्रा गरेकोमा ७० वर्षभन्दा बढी उमेर पूरा गरेका ३९ जना जेष्ठ नागरिक छन् ।

यस तथ्याङ्कअनुसार त्यस दिन यात्रा गरेका यात्रुमध्ये २.३१ प्रतिशत मात्र जेष्ठ नागरिकले नेपालगन्ज, पोखरा, भरतपुर र चन्द्रगढी विमानस्थल प्रयोग गरी यात्रा गरे । त्यस्तै एक महिनाको वायुसेवा कम्पनीहरुको तथ्याङ्क हेर्दा ३ लाख ३३ हजार ८ सय ४ जना यात्रुमध्ये ७० वर्षभन्दा बढी उमेर भएका मात्र ४ सय ८१ जना जेष्ठ नागरिकले यात्रा गरेका र जम्मा यात्रुमध्ये ०.१४ प्रतिशत जेष्ठ नागरिकले मात्र यात्रा गरेको देखियो । यसलाई आधार मान्ने हो भने जेष्ठ नागरिकको हवाई यात्रा गर्ने संख्याको अनुपात उल्लेख नहुने देखिन्छ । त्यस्ता जेष्ठ नागरिकलाई राज्यले हवाई भाडामा सहुलियत प्रदान गर्दा दायित्वभार खासै बढी नहुने कार्यदलको निस्कर्ष छ ।

यो पनि पढ्नुहोस पर्यटनमन्त्रीको कार्ययोजना : ज्येष्ठ नागरिकलाई हवाई भाडामा ५० प्रतिशत छूट !