१९ माघ, काठमाडौं । ठमेल ज्याठास्थित एक होटलको फ्ल्याट नै कब्जा गरेको आरोपमा दुई जना पक्राउ परेका छन् ।
गण्डकी प्रदेशका प्रदेशसभा सांसद दीपक मनाङ्गेको नाम लिएर फ्ल्याट कब्जा गरेको आरोपमा ३० वर्षीय र्याम्बो भनिने कोर्ते गुरुङ र ४५ वर्षीय टाँसी गुरुङ पक्राउ परेका हुन् ।
महानगरीय अपराध अनुसन्धान महाशाखाका प्रमुख एसएसपी सहकुलबहादुर थापाका अनुसार होटल संकट एण्ड अपार्टमेन्टको १०३ नम्बर कोठामा तीन महिनादेखि उनीहरु बसिरहेका थिए ।
पैसा माग्दा होटल सञ्चालकलाई गाली गलौज र फ्ल्याटमा तोडफोड समेत गरेको उजुरी परेको उनले जनाए । दुवै जना यसअघि पनि विभिन्न कसूरमा पक्राउ परिसकेका व्यक्ति भएको थापाको भनाइ छ ।
उनीले गुण्डागर्दीमा प्रयोग गर्ने गाडी र धारिलो हतियार पनि बरामद गरिएको महाशाखाका एसपी मुकेश सिंहले बताए ।
