४ फागुन, काठमाडौं । कोरोना भाइरसको उद्गमस्थल चीनको वुहानमा रहेका नेपालीहरुलाई काठमाडौंसम्म ल्याउने जिम्मेवारी नेपाल एयरलाइन्सले पाएको थियो । तर एयरलाइन्सको जिम्मेवारीमा जहाज र क्रु मेम्बरको व्यवस्थापन मात्र थियो ।

जहाजलाई सुरक्षित बनाउने, चीनमा रहेका नेपालीलाई जहाजसम्म राख्ने र त्रिभुवन अन्तर्राष्ट्रिय विमानस्थलमा अवतरण भइसकेपछि जहाजमा आएका नेपालीलाई विमानस्थलबाट खरिपाटीसम्म लैजाने व्यवस्थापनको सम्पूर्ण जिम्मा भने नेपाली सेनाले लिएको थियो ।

सेनाले चिकित्सकहरुको सल्लाहमा यस्तो व्यवस्थापन गरेको त्रिभुवन अन्तर्राष्ट्रिय विमानस्थलका महाप्रवन्धक देवेन्द्र केसीले जानकारी दिए । ‘सबै उडान अवतरण सम्पन्न भइसकेका कारण विमानस्थल खाली थियो, सबै व्यवस्थापनको जिम्मा नेपाली सेनाले लिएको थियो’ उनले भने ‘आइतबार बिहान नियमित रुपमा विमानस्थल नखुल्दै करीव २ घण्टामा सबै यात्रुलाई बसमा राखेर खरिपाटीको क्वारेन्टाइनमा लैजाने काम भयो ।’

४८ घण्टासम्म जहाज पनि क्वारेन्टाइनमा

त्रिभुवन अन्तर्राष्ट्रिय विमानस्थल व्यवस्थापनले वुहानबाट नेपालीहरुलाई लिएर आएको जहाजलाई ‘रिमोर्ट पार्किङ वे’मा राखेको छ । यो पार्किङ वे आपतकालीन अवस्थामा प्रयोग गर्न बनाइएको हो ।

खासगरी विमान अपहरणमा परेको बेला आपतकालीन अवतरण गर्न तथा सरुवा रोगका बिरामी बोकेको जहाजलाई अन्य जहाज र यात्रुभन्दा टाढा राख्नुपर्ने अन्तर्राष्ट्रिय प्रावधान अनुसार गत वर्ष मात्र यो पार्किङ वे बनाइएको हो । यहाँ नेपाल एयरलाइन्सको जहाज ४८ घण्टासम्म रहनेछ ।

यो पनि पढ्नुहोस चीनबाट छोराछोरी आएपछिको खुसी, ‘बल्ल छटपटी सकियो’

अधिकारीहरुकाअनुसार वुहान उड्नुअघि वाइडबडी जहाजका हरेक सीटलाई ‘र्‍याप’ गरेर सुरक्षित बनाइएको थियो । चिकित्सकको निगरानी तथा पर्यटन तथा स्वास्थ्य मन्त्रालयका अधिकारीको उपस्थितिमा जहाजलाई सुरक्षित पारिएको थियो । जहाज अवतरण भइसकेपछि चिकित्सकहरुले नै जहाजमा गर्नुपर्ने आवश्यक प्रक्रिया पुरा गरेका थिए ।

त्यसपछि जहाजका सीट ‘र्‍याप’ गरेको वस्तुसहित प्रयोग भएका सबै बाह्य वस्तुहरु नष्ट गर्ने काम नेपाली सेनाले गरेको छ । यो जहाज ४८ घण्टाको क्वारेन्टाइन अवधि पुरा भइसकेपछि नियमित उडानमा जानेछ ।

२४ सै घण्टा चल्यो त्रिभुवन विमानस्थल

दैनिक २१ घण्टा संचालनमा रहेको त्रिभुवन विमानस्थल आइतबार भने २४ सै घण्टा खुला रह्यो । शनिबार राति निर्धारित सबै उडान–अवतरण सम्पन्न भइसकेपछि वाइडबडी जहाज काठमाडौं अवतरण गरेको थियो ।

बिहान काठमाडौंबाट हुने उडान–अवतरण प्रारम्भ नहुँदै वाइडबडीबाट यात्रु खरिपाटी लैजाने प्रक्रिया सकिएको विमानस्थलका महाप्रवन्धक केसीले जानकारी दिए । ‘बाहिर अफवाह फैलियो, विमानस्थल बन्द छ,’ उनले भने, ‘तर विमानस्थल २४ सै घण्टा खुला थियो, सेड्यूल फ्लाइट एउटा पनि रद्द वा डाइभर्ट नगरी यो काम सम्पन्न भयो ।’

यो पनि पढ्नुहोस कोरोनाले निम्त्याएको यात्रा : वुहानदेखि खरिपाटीसम्म

तस्वीरहरु : विकास श्रेष्ठ/अनलाइनखबर