११ फागुन, काठमाडौं । कोटेश्वरमा हुने सवारी चाप न्यूनिकरण गर्न ट्राफिक प्रहरीले नयाँ प्रावधान अघि सारेको छ ।
सूर्यविनायक–जडिबुटी सडक-खण्डमा यात्रुबाहक तथा मालबाहक सवारी साधन र कम गतिमा गुड्ने सवारी साधानहरु बायाँ लेनबाट मात्र कुदाउने नियम लागू गर्न लागिएको हो ।
दाहिने लेनबाट भने निजी तथा साना सवारीसाधन मात्रै गुड्नेछन् । यो प्रावधान १४ फागुनदेखि लागू हुने महानगरीय ट्राफिक प्रहरी महाशाखाका एसएसपी भिमप्रसाद ढकालले अनलाइनखबरलाई बताए ।
उनका अनुसार उपत्यकाको सवारी आवागमनलाई सहज बनाउन प्रहरी उपरीक्षक जीवनकुमार श्रेष्ठको अध्यक्षतामा गठित सुझाव समितिले बुझाएको प्रतिवेदनका आधारमा यो नियम लागू गर्न लागिएको हो ।
यो प्रावधानले ट्राफिक व्यवस्थापन र दुर्घटना न्यूनिकरणमा उल्लेख्य सुधार हुनसक्ने भनिएको छ ।
