तस्वीर देखाएर ब्ल्याकमेलिङ, आत्महत्यापछि दुई जना पक्राउ

१३ फागुन, विराटनगर । विवाहित महिलालाई आत्महत्या गर्न बाध्य बनाएको आरोपमा मोरङ प्रहरीले दुई जनालाई पक्राउ गरेको छ ।

पक्राउ पर्नेमा सुन्दरहरैचा ६ बस्ने १९ वर्षीया संजिता निरौला र सुन्दरहरैचा ४ बस्ने ऋषिराम भट्टराई छन् । उनीहरुले मोरङको सुन्दरहरैचा नगरपालिका–५ बस्दै आएकी प्रीति तिम्सिना अधिकारीलाई आत्महत्या गर्न बाध्य पारेको आरोप छ ।

नग्न तस्वीर देखाएर ब्ल्याकमेलिङ

८ फागुनमा प्रीतीले आत्महत्या गरेको खबर पाएपछि पुगेको प्रहरीले सुसाइट नोट फेला पारेको थियो । सुसाइट नोटमा दुई वटा फेसबुक एकाउन्टबाट नग्न तस्वीर देखाएर आफूलाई ब्लाकमेलिङ गरेको उल्लेख थियो ।

अनुसन्धानका क्रममा ड्याजलिङ क्वीन र दीपा नाम गरेको फेसबुक आइडीबाट नग्न तस्वीर प्रीतिको म्यासेन्जरमा पठाएर पैसा नदिए भाइरल बनाइदिने डर देखाइएको पाइएको थियो । फेसबुक आइडी चलाउने व्यक्तिको खोजी गर्ने क्रममा प्रहरी ऋषिरामसम्म पुग्यो ।

प्रहरीले अनुसन्धानका क्रममा भट्टराईले एक वर्षयता नग्न तस्वीर देखाएर पैसा असुल्दै आएको स्वीकार गरे । पैसा लिन भने उनले सञ्जितालाई प्रयोग गर्दै आएका थिए ।

प्रीतिले आत्महत्या गर्नुअघि पनि भट्टराईले पैसा नदिए फोटो भाइरल गरिदिने धम्की दिएका थिए । तर उनीसँग पैसा थिएन । मागेजत्ति पैसा दिन नसक्ने भएपछि उनले आत्महत्याको बाटो रोजेको प्रहरीको अनुसन्धानबाट खुलेको छ ।

जिल्ला प्रहरी कार्यालय मोरङका प्रहरी उपरीक्षक विश्व अधिकारीले सुसाइट नोटका आधारमा पक्राउ परेका दुई जनाविरुद्ध आत्महत्या दुरुत्साहन मुद्दामा अनुसन्धान सुरु गरिएको बताए ।

प्रीतिका श्रीमान केही वर्षअघि वैदेशिक रोजगारीमा थिए । अनुसन्धानको क्रममा मृतक र पक्राउ परेकाहरु बीच चिनजान भएको देखिएको प्रहरी बताउँछ ।