१५ फागुन, काठमाडौं । साझा पार्टीको तीन दिने राष्ट्रिय भेला लुम्बिनीमा सुरु हुँदैछ । भेलाको बिहीबार मध्यान्ह तीन बजे उद्घाटन हुने पार्टी प्रवक्ता डा. सूर्यराज आचार्यले जानकारी दिए ।
आचार्यका अनुसार भेलाका सहभागीहरूले साँझ मायादेवी मन्दिरमा शान्ति दीप प्रज्वलन गर्ने, शुक्रबार समूहगत प्रस्तुति तथा छलफल र अन्तिम दिन छलफलमा उठेको प्रश्नको जवाफ केन्द्रीय नेतृत्वले दिने कार्यक्रम छ ।
अन्तिम दिन नै पार्टीको रणनीति र कार्ययोजना पारित गरी लुम्बिनी घोषणापत्र जारी हुने उनले बताए । भेलामा सातै प्रदेश र विदेशस्थित सद्भाव समूहबाट समेत गरेर पाँच सय अगुवा सदस्यहरू सहभागी हुने आयोजकले जानकारी दिएको छ ।
