२९ फागुन, काठमाडौं । नेपाल राष्ट्र बैंकले २ करोड रुपैयाँसम्म ऋण लिन आउनेका लागि कर चुक्ताको प्रमाण पत्र पेश गर्न नपर्ने बताएको छ । बिहीबार बैंक तथा वित्तीय संस्थाहरुलाई एकीकृत निर्देशन जारी गर्दै राष्ट्र बैंकले यो व्यवस्था कार्यान्वयन गर्न भनेको हो ।
केहि महिना अघि ऋण लिन आउनेहरुका लागि कर चुक्ता प्रमाणपत्र अनिवार्य गरेको राष्ट्र बैंकले मौद्रिक नीतिको अर्धवार्षिक समीक्षा गर्दै २ करोडसम्म ऋण लिन करचुक्ताको प्रमाणपत्र नचाहिने व्यवस्था गरेको थियो ।
मौद्रिक नीतिको समीक्षा कार्यान्वयनका लागि बिहीबार एकीकृत निर्देशन जारी गरिएको राष्ट्र बैंकका कार्यकारी निर्देशक देवुकमार ढकालले जानकारी दिए ।
उनका अनुसार अब ५० लाख रुपैयाँसम्म ऋण लिनका लागि कर तिरेको प्रमाण अनिवार्य गरिएको छैन । ५० लाख रुपैयाँदेखि २ करोड रुपैयाँसम्म ऋण लिनका लागि भने कर तिरेको प्रमाणमात्रै बैंकमा पेश गरे पुग्छ ।
कर तिरेको भए पनि कर चुक्ताको प्रमाणपत्र भने लिइएको हुँदैन । यस्तो अवस्थामा पनि २ कराेड रुपैयाँसम्म ऋण लिन सकिने ढकालले बताए ।
२ करोड भन्दा पनि माथि ऋण लिन चाहनेले भने कर तिरेको प्रमाणमात्रै नभएर करचुक्ताको प्रमाणपत्र नै पेश गर्नु पर्ने कार्यकारी निर्देशक ढकालले जानकारी दिए ।
‘कर तिरेपनि करचुक्ताको प्रमाणपत्र नै लिइएको हुँदैन, कर त तिर्नु त पर्यो तर ५० लाखदेखि २ करोडसम्म लिनेले करचुक्ताको प्रमाण पत्र नै पेश गर्नु पर्दैन’ उनले भने, ‘२ करोड रुपैयाँ माथिका लागि भने कर चुक्ताको प्रमाणपत्र नै अनिवार्य गरिएको हो ।’
