१९ चैत, वीरगञ्ज । पर्सामा दुई सातायता भारत लगायत अन्य मुलुकबाट आएकाहरुको लगत राखिने भएको छ ।
कोरोना भाइरस (कोभिड–१९) को संक्रमण रोकथाम तथा नियन्त्रणका लागि सतर्कता अपनाउन विदेशबाट आएकाहरुको लगत तयार गर्न लागिएको पर्साका प्रमुख जिल्ला अधिकारी विष्णुकुमार कार्कीले बताए ।
जिल्ला विपद् व्यवस्थापन समितिको बैठकले १४ दिनयता भारत लगायत तेस्रो मुलुकबाट आएका व्यक्तिहरुको लगत राख्न निर्णय गरेको उनले बताए ।
कोरोना भाइरसको संक्रमण भित्रिन र फैलन नदिन आपसी समन्वयका साथ मिलेर काम गर्ने निर्णय गरिएको सहायक प्रमुख जिल्ला अधिकारी ललितकुमार बस्नेतले जानकारी दिए ।
जिल्लाका विभिन्न स्थानमा स्थापना गरिएका क्वारेन्टाइन र आइसोलेसन वार्ड व्यवस्थित नभएको भन्दै कार्यक्रममा सहभागीहरुले तत्काल त्यसको उचित व्यवस्थापन गर्न सुझाव दिएका थिए ।