२१ चैत, काठमाडौं । बेलायती स्वास्थ्यमन्त्री म्याट ह्यांककले कोरोना भाइरसको महामारीका बेला प्रिमियर लिगका खेलाडीले केही तलब त्याग गर्नुपर्ने बताएका छन् ।
‘धेरै मानिसले गरेको त्यागको आधारमा प्रिमियर लिगका खेलाडीले गर्नसक्ने पहिलो काम भनेको केही योगदान हो,’ सरकारको नियमित पत्रकार सम्मेलनमा ह्यांककले भने ।
यस्तै प्रोफेसनल फुटबलर संघले पनि खेलाडीले आर्थिक बोझलाई साझेदार गर्नुपर्ने जनाएको छ ।
ह्यांककको भनाइ त्यस्तो बेला सार्वजनिक भएको हो, जतिबेला बेलायतमा कोरोना भाइरसको कारण २ हजार ९ सय २१ जनाको मृत्यु भइसकेको छ ।
कोरोना भाइरसको कारण युरोपका अन्य राष्ट्र स्पेन, इटलीका ठूला क्लब खेलाडीको तलब कटौती गर्न तयार भइसकेका छन् ।
तर, प्रिमियर लिगका क्लबका खेलाडीको हकमा भने अहिले तलब कटौती विषयमा केही निर्णय भएको छैन ।
कोरोना भाइरसको कारण प्रिमियर लिगलगायत व्यावसायिक फुटबल ३० अप्रिलसम्म स्थगित गरिएको छ ।
