टाइल्सले घरलाई केवल आधुनिक मात्रै देखाउँदैन। त्यसको साथ-साथै घरलाई सुन्दर, सफा देखाउन पनि सहयोग पुर्याउँछ । सुरुमा भान्छा र बाथरुममा मात्र टाइल्सको प्रयोग हुने गरेकामा हिजोआज घरको कौसी, बरण्डादेखि पार्किङ र आँगनसम्म पनि टाइल्स लगाउने चलन बढ्दै गएको छ ।
अझ हिजोआज त टाइल्स घरको भुईमा मात्र नभएर घरको भित्ताहरुमा समेत टाइल्स लगाउने चलन बढ्दै गएको छ । त्यसरी घर निर्माणमा टाइल्सको महत्व दिन-दिनै बढ्दै गएको छ।
झट्ट हेर्दा राम्रो देखिने र त्यति धेरै महंगो पनि नपर्ने भएकाले अहिले हरेक घरमा टाइल्सको प्रयोग निकै बढेको हो । हिजोआज बजारमा विभिन्न आकार, डिजाइन, बुट्टा तथा रंगहरुमा टाइल्स उपलब्ध छन् । त्यस्ता, टाइल्सहरुको मूल्य तिनीहरुको गुणस्तर र ब्राण्ड अनुसार फरक-फरक हुन्छ ।
जुन घर व्यवस्थित र सफा घर हुन्छ। त्यसको सम्पूर्ण क्रेडिट गृहिणीलाई दिइन्छ। सुरुमा घरको भुइँ माटो अथवा इँटा र सिमेन्टको हुन्थ्यो । हरेक कुरामा परिर्वतन भए झैं भुइँमा माटो, इँटा र सिमेन्टको स्थान टाइल्सले लिएको छ ।
टाईल्स देख्दा जति आकर्षक हुन्छ। त्यसलाई सफा गर्नपनि त्यति नै सजिलो छ । यदि टाइल्सलाई चम्काएर राख्ने हो भने घर एकदम सुन्दर देखिन्छ । तर, त्यही टाइल्समा सानो दाग अथवा फोहोर लाग्यो भने त्यसको शोभा बिग्रनसक्छ । टाइल्सलाई सफा राख्न घरको लागि मात्र नभइ रोगहरुबाट सुरक्षित रहनका लागि पनि यसको सफाई आवश्यक हुन्छ । त्यसैले यहाँ केही त्यस्ता सजिला र प्रभावकारी जानकारीहरु प्रस्तुत गरेका छौं, जसले तपाईंको टाइल्सलाई सुन्दर,आकर्षक र चम्किलो बनाउँछ ।
कम समयमा नै आफ्नो घरको टाइल्स सफा गर्नु छ भने कागती काट्नुहोस् । त्यसको रसलाई बाल्टिनमा निचोर्नुहोस् । कागतीको रसमा पानी मिसाउनुहोस् र टाइल्स लगाइएको भुइँ पुछ्नुहोस् ।
त्यस्तै, टाइल्समा कागती रगडेर १० देखि १५ मिनेटसम्म त्यसै छाडिदिनुपर्छ । एकछिन पछि नरम चिसो कपडाले पुछ्नुपर्छ । त्यसो गर्नाले टाइल्समा लागेको दाग हट्छ ।
टाइल्स लगाइएको भुइँमा चिया, कफी अथवा अन्य कुनै पुराना दाग लागेका छन् भने यिनीहरुलाई सफा गर्नका लागि भेनेगरको प्रयोग गर्न सकिन्छ । त्यसका लागि तातो पानीमा थोरै भेनेगर मिसाउने र त्यसले टाइल्स सफा गर्नुपर्छ। त्यसपछि साबुन अथवा सर्फ मिसाएको तातो पानीले सफा गर्नुपर्छ । त्यसो गर्दा सबै दाग हट्छ ।
पेराफिन र नुनमा कपडा भिजाएर टाइल्स सफा गर्नाले यसको चमक यथावत रहन्छ । रातभरी टाइल्समा ब्लिचिङ पाउडर लगाएर राख्ने र बिहान त्यसलाई सफा गर्ने । त्यसो गर्दा टाइल्स चमक्क चम्किन्छ ।
लिक्विड अमोनिया र साबुनको घोलले पनि टाइल्सलाई सफा गर्न सकिन्छ । एक बाल्टी पानी लिने र त्यसमा एक कप अमोनिया र साबुनको घोल मिलाएर टाइल्स सफा गर्नुपर्छ ।
तपाईं आफ्नो घरको टाइल्स लगाइएको भुइँ सफा गर्नका लागि इथानोलको प्रयोग पनि गर्न सक्नुहुन्छ । एक बाल्टी पानीमा एक चम्चा इथानोल मिसाएर भुइँ सफा गर्नुपर्छ । त्यसो गर्दा टाइल्समा भएका सबै दागहरु हट्छ ।
तपाईं टाइल्समा लागेको दाग हटाउनका लागि आलुको पनि प्रयोग गर्न सक्नुहुन्छ । आलुलाई काटेर त्यसलाई टाइल्समा रगड्नुपर्छ । त्यसलाई १५ मिनेटसम्म त्यसै छाडिदिनुपर्छ र पछि तातो पानीले सफा गर्नुपर्छ । टाइल्स एकदम नयाँ जस्तै चम्किलो हुन्छ ।
सेतो टाइल्स सफा गर्नका लागि ७५ प्रतिशत पानीमा २५ प्रतिशत ब्लिच अथवा अक्सिजन ब्लिच मिसाएर रगड्ने अथवा ब्रस लगाउँदै सफा गर्नुपर्छ।
टाइल्स पुछ्दा पानीमा सर्फ मिसाउनुपर्छ र त्यसको घोलले टाइल्स सफा गर्नुपर्छ । तपाईंले दिनहुँ त्यसरी टाइल्स सफा गर्नाले तपाईंको घरको भुइँ सधैं चम्किलो भइरहन्छ ।
