२७ चैत, काठमाडौं । गत माघदेखि बन्द रहेको सिन्धुपाल्चोकको तातोपानी नाका सञ्चालनमा आएको छ । अत्यावश्यक सामग्री ल्याउन लागि बुधबार साँझदेखि नाका खोलिएको सिन्धुपाल्चोकका सहायक प्रमुख जिल्ला अधिकारी बाबुराम खनालले अनलाइनखबरलाई जानकारी दिए ।
पहिलो दिन १० बाकस सेनिटाइजर र १९ बाकस मास्क भित्रिएको छ । विश्व स्वास्थ्य संगठनले तोकेको मापदण्ड अनुसारको हेल्थडेस्क राखेर नाका खोलिएको खनालको भनाइ छ ।
शुक्रबार ठूला परिमाणमा सामान आइपुग्ने तातोपानी भन्सार कार्यालय प्रमुख लालबहादुर खत्रीले बताए । तत्कालका लागि चीनले अत्यावश्यक वस्तु मात्रै नाका भएर पठाउने जानकारी दिएको उनको भनाइ छ ।
चीनमा कोरोना (कोभिड-१९)को संक्रमण बढेपछि १३ माघदेखि नाका बन्द थियो ।
