१० वैशाख, गोरखा । गोरखाको मनास्लु संरक्षण क्षेत्रमा लोपोन्मुख गिद्ध भेटिएको छ । चुमनुव्री गाउँपालिका–३ सिर्दिवासको नाक्चेतस्थित एक स्थानीयको घरमा बिरामी अवस्थामा गिद्ध फेला परेको हो । बिरामी अवस्थामा फेला परेको गिद्धको मनास्लु संरक्षण क्षेत्र (एमक्याप) ले उद्दार गरेको छ ।
‘खाना नपाएर हो की बिरामी भएर हो उड्न पनि नसकेर कमजोर अवस्थामा घरमा बसिरहेको रहेछ,’ एमक्यापका प्रमुख नरेन्द्र लामाले भने, ‘गिद्धलाई अहिले संरक्षणका लागि पिँजडाभित्र राखेका छौं ।’ घरमा गिद्ध आएपछि स्थानीयले सिर्दिवासको फिलिमस्थित एमक्यापको कार्यालयमा खबर गरेका थिए । लगतै कर्मचारी खटाएर उद्दार गरिएको लामाले बताए ।
‘चितवनमा रहेको पन्छी संरक्षण संघ नेपालले संरक्षण गरेर राखेको गिद्ध रहेछ, खुट्टामा ३९ नम्बरको ट्याग लगाइएको छ,’ उनले भने । भेटेरिनरी डाक्टरको सल्लाह र सुझावअनुसार गिद्धलाई आहारा दिइरहेको उनले बताए । उनकाअनुसार अहिले गिद्धको अवस्था सुधार हुँदै गएको छ । ‘गिद्ध फेला परेपछि हामीले सौराहामा रहेको जैविक विविधता संरक्षण केन्द्रसँग समन्वय पनि गरिसकेका छौं । फेला परेको गिद्ध संरक्षित गिद्ध हो भन्ने खुल्न आएको छ, उद्दारको लागि त्यहाँबाट प्राविधिक टोली आउँदै गरेको खबर हामीले पाएको छौं ।’ उनले भने ।
