बलिउड नायिका अनुष्का शर्माले निर्माण गरेको ‘पाताल लोक’ नामक एक वेव सिरिजमा नेपाली महिलाहरूमाथि अपशब्द प्रयोग गरिएको दृश्य सार्वजनिक भएपछि सामाजिक सञ्जालमा यसको चर्को विरोध भइरहेको छ ।
नेपाली महिलालाई प्रयोग गरिएको यो शब्दमा निर्मात्रीको रुपमा अनुष्काले माफी माग्नुपर्ने माग पनि उठेका छन् । सामाजिक सञ्जालमा नेपाली चलचित्रका कलाकारहरूले पनि यो विषयमा आफ्नो मुख खोलेका छन् । नायिका केकी अधिकारीले भने केही फरक विचार प्रस्तुत गरेकी छिन् ।
उनले, आफ्नै देशमा महिलामाथि यस्ता खालका शब्द प्रयोग भएको भन्दै उनीहरूले हामीबाट नै सिकेका हुन् भनेकी छिन् । केकी लेख्छिन्–‘भो छाडिदिनुहोस्, आफ्नाले भन्न छाडेका छन् र अरूले नभनून् । आज अरूले आफ्ना चेलीबेटीलाई देशकै नाम लिएर तुच्छ गाली गर्दा साह्रै चित्त दुख्यो ? मन पोल्यो ? रगत उम्लेर आयो ? आफ्नै भनाउँदाहरूबाट यस्ता गालीहरू मुख अगाडि, मुख पछाडि, सामाजिक सञ्जालमा, युट्युबमा वाल्लछ्याल्टी नसुनेको, नदेखेका हौ र ?’
उनीहरूले पनि हामीबाटै सिकेका हुन् भन्दै उनले लेखेकी छिन्–‘यिनीहरूलाई भन्न मिल्ने रहेछ भनेर हामीले नै उकासेका हौं । छातीमा हात राखेर भन्नुहोस् त हामीले आफ्नै देशका दिदीबहिनीहरूलाई यस किसिमका अवहेलना कति गरेका छौं ? अनि हामी यो आशा गरिरहेका छौं कि अरू चाहिँ बदलिऊन् । तर, आफूलाई त जति पनि अधिकार छ महिलाको चरित्र हत्या गर्ने ? होइन ?’
उनले, भारतीय वेव सिरिजमा देखाइएको कुरा माफी योग्य नभएको बताएकी छिन् । तर, के हामी पनि ठिक छौं त भनेर नियाल्न पनि आग्रह गरेकी छिन् ।
