४ जेठ, काठमाडौं । कतारले मास्क प्रयोगलाई अनिवार्य गरेको छ । कतारले अहिले ल्याएको नियम नमान्नेलाई तीन वर्षसम्मको जेल वा ५५ हजार डलर जरिवानाको सजाय व्यवस्था गरिएको छ ।
प्रतिव्यक्ति संक्रमणको हिसाबमा अहिले कतार विश्वमा कोरोना भाइरसबाट सबैभन्दा बढी प्रभावित मुलुकमध्येको एक हो । ३० लाख जनसंख्या रहेको कतारमा अहिलेसम्म ३० हजार मानिसमा कोरोना भाइरसको संक्रमण देखिइसकेको छ ।
कोरोना भाइरसको महामारी नियन्त्रणको लागि कतारमा मस्जिद, स्कुल, कलेज, मल आदि बन्द गरिएको छ । तर, भवन निर्माणमा भने कुनै रोक लगाइएको छैन ।
कतार सन् २०२२ मा विश्वकप फुटबल आयोजना गर्ने तयारीमा छ । त्यसैले त्यसको तयारीलाई कुनै असर नपरोस् भन्नका लागि उसले निर्माणको कार्यमा कुनै प्रतिबन्ध नलगाउने निर्णय गरेको हो ।
स्रोत : बीबीसी ।
