७ जेठ, काठमाडौं । अर्को वर्ष युरोपका तीन ठूला क्लब रियल मड्रिड, वायर्न म्युनिख र इन्टरमिलान सम्मिलित युरोपियन सोलिडारिटी कप आयोजना हुने भएको छ ।
अहिले विश्वमा महामारी बनेर फैलिएको कोरोना भाइरस (कोभिड–१९) को पीडितका लागि रकम संकलन गर्न अर्को वर्ष ट्राई टुर्नामेन्ट फुटबल आयोजना हुन लागेको हो । युरोपका तीन क्लब ‘युरोपियन सोलिडारिटी कप– फुटबल फर हिरोज’ अर्को वर्ष आयोजना गर्न तयार भएका हुन् ।
युरोपका मानिसहरुमा एकता र भ्रातृत्वको सन्देश प्रवाह गर्न तीन क्लब सँगै खेल्न लागेको रियल मड्रिडले सार्वजनिक गरेको विज्ञप्तीमा उल्लेख छ ।
सोलिडारिटी कप अन्तर्गत २०२१ मा युरोपको तीन शहरमा तीन फुटबल खेल हुनेछ । खेलको मिति भने फुटबल क्यालेन्डर र दर्शक खेलमा फर्कन सक्ने समय हेरेर तय गरिने जनाइएको छ ।
तीन टिमले एक आपसमा खेल्नेछन् भने एक शहरमा एक खेल हुनेछ ।
वायर्न म्युनिखले घरेलु मैदान एलिएन्ज एरेनामा रियल मड्रिडसँग खेल्नेछ । यस्तै रियलले घरेलु मैदान बर्नाबेउमा इन्टर मिलानसँग खेल्नेछ भने इन्टर मिलानले वायर्न म्युनिखसँग मिलानमा खेल्नेछ ।
तीन खेलबाट उठेको रकम इटली र स्पेनमा स्वास्थ्य सामाग्री किन्नका लागि खर्च गरिनेछ । कोभिड–१९ बाट युरोपमा इटली र स्पेन धेरै प्रभावित भएको देशमा अगाडि छ ।
