३० असार, काठमाडौं । भारतमा कोरोना भाइरस (कोभिड–१९) बाट संक्रमित हुनेको संख्या नौ लाख नाघेको छ । भारतको स्वास्थ्य मन्त्रालयका अनुसार अहिलेसम्म भारतमा कोरोना भाइरसबाट संक्रमित हुनेको संख्या नौ लाख ६ हजार ७५२ पुगेको हो ।
पछिल्लो २४ घण्टामा मात्र भारतमा कोरोना भाइरसका २८ हजार ४९८ नयाँ संक्रमित फेला परेका छन् ।
त्यस्तै भारतमा कोरोना भाइरसको कारण मृत्यु हुनेको संख्या पनि २३ हजार ७२७ पुगेको छ । पछिल्लो २४ घण्टामा मात्र भारतमा कोरोना भाइरसको कारण ५५३ जनाको मृत्यु भएको हो ।
भारतको सबैभन्दा प्रभावित महाराष्ट्रमा अहिलेसम्म कोरोना भाइरसका दुई लाख ६० हजारभन्दा बढी संक्रमित भेटिँदा १० हजार ४८२ जनाको मृत्यु भइसकेको छ । तामिलनाडुमा पनि एक लाख ४२ हजारभन्दा धेरै कोरोना संक्रमित फेला परेका छन् भने दुई हजार ३२ भन्दा बढीको मृत्यु भइसकेको छ । दिल्लीमा एक लाख १३ हजारभन्दा बढी संक्रमित फेला परेका छन् भने तीन हजार ४११ जनाको मृत्यु भइसकेको छ ।
अहिलेसम्म भारतमा कोरोना भाइरसका पाँच लाख ७१ हजार ४६० कोरोना संक्रमित निको भएर घर फर्किसकेका छन् ।
