३१ असार, गुल्मी । गुल्मीको रागेढुंगामा सडकमाथि ठूला–ठूला ढुंगा अड्किएकाले तम्घास–सिमलटारी यात्रा जोखिमपूर्ण बनेको छ ।
स्थानीय झबि पाण्डे भन्छन्, ‘दैनिकजसो पानी परिरहेकाले जतिबेला पनि ठूला ढुंगासहितको पहिरो जान सक्छ । पहिरो झरेर पुर्छ कि भनेर गाडि चालक र पैदल यात्रुहरु माथि हेर्दै हिँड्नुपर्छ ।’
दिउँसोको समयमा माथि हेरेर हिँड्ने गरे पनि रातिको समयमा भने यात्रा गर्न समस्या हुने गरेको पाण्डेले बताए ।
गुल्मीको धुर्कोट गाउँपालिकामा केही दिन पहिले गुडिरहेको सवारी साधनलाई सडक माथिबाट खसेको पहिरोले पुर्दा दुई जनाको मृत्यु भएको थियो ।
रागेढुंगाको पहिरोले ठूलो क्षति हुन नदिन तत्कालै पहिरो रोक्ने उपाय अपनाउनुपर्ने वा जोखिमपूर्ण अवस्थामा रहेका ढुंगा हटाउनुपर्ने स्थानीयको जोड छ ।
सडकमा खसेको पहिरो हटाएर सवारी आवागमन सुचारु गरिए पनि सडकमाथि अड्किएका ढुंगा भने हटाइएको छैन ।
केही वर्ष पहिले रैदी रागेढुंगा मन्दिर नजिकै पनि ठूलो ढुंगा जोखिमपूर्ण अवस्थामा रहेको थियो । सो ढुंगालाई नेपाली सेनाको टोलीले हटाएको थियो ।
