‘जेलबाट त जसोतसो छुटायौं तर, त्यही छोरा गुमायौं’

४ साउन, सिरहा । मिर्चैया नगरपालिका–९ बतहा खोला नजिकै एक युवकको ३० असार साँझ ६ः ३० बजे शव भेटियो । मृतकको पहिचान नखुलेपछि शव परीक्षणका लागि लहान अस्पताल ल्याइयो । २ साउनसम्म पहिचान खुलेन ।

प्रहरीले अस्पतालमा एउटा शव ल्याएको खबर लहान नगरपालिका–१का सिफैत मोचीले थाहा पाए । उनका छोरा १८ वर्षका रोशन राम २७ गतेदेखि घर आएका थिएनन् । त्यसैले उनी अस्पताल पुगे । शव हेर्नासाथ मुर्छित भए ।

शव उनकै छोरा रोशनको थियो । ‘कतै हत्या त भएन भन्ने डर लागिरहन्थ्यो’ रोशनका बाबु सिफैतले भने, अस्पताल पुग्दा हाम्रो शंका सही सावित भयो ।’

जेलमा लिएको ऋण

रोशन वैशाख अन्तिम साता लागूऔषधसहित लक्ष्मीपुर पतारीबाट पक्राउ परेका थिए । इलाका प्रहरी कार्यालय, लहानको थुनामा राखिएका उनलाई जिल्ला अदालतले जेठ अन्तिम साता १० हजार धरौटीमा रिहा गर्ने आदेश दियो ।

तर धरौटी बुझाउन नसक्दा जेल चलान भए । जेलमा उनको भेट लागूऔषधकै मुद्दामा थुनामा रहेका मिर्चेया नगरपालिका २ का जयकुमार यादवसँग भयो । उनले घर फर्किएपछि तिर्ने शर्तमा कारागारमै यादवसँग १ हजार रुपैयाँ सापटी लिए ।

बुबाले धरौटी रकम जोहो गरेपछि रोशन १० असारमा रिहा भए । त्यही दिन जयकुमार छुटे । त्यसको एक सातापछि जयकुमार जेलमा दिएको एक हजार सापटी माग रोशनको घरमा पुगे । त्यो बेला रोशन घरमा थिएनन् । जयकुमारले उनकी आमा सुनैरदेवीलाई रकम नदिए नछाड्ने भनी धम्की दिएर फर्किए ।

त्यसबेलासम्म आमाबुवालाई रोशनले कारागारमै जयकुमारसँग रकम लिएको थाहा थिएन । उनी २६ गते रकम माग्दै पुगे । रोशनका आमाबुवाले जसरी रकम दिने बताएपछि उनी फर्किए । भोलिपल्ट उनी अर्का साथी लिएर आए । ‘त्यसदिन जयकुमारले राम्रैसँग कुरा गरे’ रामका पिता सिफैतले भने, ‘तिमी ससुराली घुम्न जाने हो भन्दै छोरा रोशनलाई लिएर गए ।’

श्रीमती माइतमै रहेका कारण रोशन राजी भए । जयकुमारले मोटरसाइकल लिएर आएका थिए, त्यसमै रोशन मिर्चैयास्थित ससुराली पुगे । तर धेरै बेर बस्न नदिएको रोशनकी पत्नी अञ्जली बताउँछिन् । त्यहाँबाट फर्किएका रोशन एकाएक सम्पर्कविहीन भएपछि परिवार चिन्तित भए र, ३० गते उनको शव भेटियो ।

रोशनलाई जयकुमार र उनको साथमा आएका मुकेश कटुवालले धारिलो हतियार प्रहार गरी हत्या गरेको परिवारको दाबी छ । ‘जसोतसो १० हजार खोजेर छोरालाई जेलबाट छुटाएर ल्यायौं, तर त्यही छोराको हत्या भएको छ’ रोशनका पिता सिफैतले भने, ‘मलाई न्याय दिलाइदिन सबैसँग अनुरोध गर्दछु ।’

प्रहरीले जयकुमार र मुकेशलाई नियन्त्रणमा लिएको छ । घटनाबारे अनुसन्धान भइरहेको इलाका प्रहरी कार्यालय मिर्चेयाका प्रमुख डीएसपी सन्टु जयसवालले बताए ।