१२ साउन काठमाडौं । अन्तर्राष्ट्रिय क्रिकेट काउन्सिल (आईसीसी)ले आईसीसी पुरुष विश्वकप सुपर लिगको घोषणा गरेको छ ।
सन् २०२३ मा भारतका आयोजना हुने एक दिवसीय विश्वकपको रोडम्यापको रुपमा रहेको विश्वकप सुपर लिगको खेल यही जुलाई ३० देखि सुरु हुने आईसीसीले जनाएको छ ।
जसअन्तर्गत इंग्ल्याण्ड र आयरल्याण्डबीच हुने एकदिवसीय सिरिज सुपर लिगको पहिलो खेल हुनेछ ।
सुपर लिगमा १३ टिमको सहभागिता रहने छ । जसमा १२ टेष्ट राष्ट्र र नेदरल्याण्ड्सले प्रतिस्पर्धा गर्नेछन् ।
सन् २०१५-१७ सम्म भएको विश्व क्रिकेट लिगको विजेता बनेकोले नेदरल्याण्ड्सले सुपर लिगमा खेल्ने अवसर पाएको हो ।
सुपर लिगमा होम एण्ड अवेका आधारमा चार-चार सिरिज खेलिनेछ । सुपर लिगमा शीर्ष ७ मा पर्ने टिमले सन् २०२३ मा हुने एकदिवसिय विश्वकपमा स्थान बनाउनेछ ।
