१६ भदौ, हेटौंडा । हेटौंडा उपमहानगरपालिका क्षेत्रमा एकै दिन ३० जनामा कोरोना संक्रमण पुष्टि भएको छ ।
२९ जना हेटौंडाकै वासिन्दा र एक जना हेटौंडामा कार्यरत पुरुषमा कोरोना संक्रमण पुष्टि भएको उपमहानगरपालिकाका जनस्वास्थ्य निरीक्षक भोला चौलागाईले जानकारी दिए ।
भदौ १३ गते संकलन गरेको स्वाबको रिपोर्ट मंगलबार सार्वजनिक भएको हो । कुल २ सय ७५ जनामा संकलन गरिएको संकलनमा २ सय ४० जनाको कोरोना रिपोर्ट नेगेटिभ आएको चौलागाईले बताए ।
पछिल्ला दिनमा मकवानपुरका अरु नौ वटा स्थानीय तहमा भन्दा पनि हेटौंडामा कोरोना संक्रमित देखा परेका छन् ।
हेटौंडा औद्योगिक क्षेत्रमा सञ्चालनमा रहेको एक उद्योगमा कार्यरत ११ जना मजदुरमा कोरोना पुष्टि भएको छ ।
उपमहानगरपालिका भित्र रहेको बहुराष्ट्रिय कम्पनी बर्जर पेन्टमा कार्यरत ११ जनामा कोरोना भाइरस संक्रमण पुष्टि भएको हो ।
