१८ भदौ, जनकपुरधाम । धनुषा र सर्लाहीको छुट्टाछुट्टै ठाउँमा बिहीबार दुईजना महिलाको शव फेला परेको छ ।
धनुषाको धनौजी गाउँपालिका वडानम्बर १ लखौरीमा पानीमा तैरिरहेको अवस्थामा एकजना महिलाको शव फेला परेको प्रहरीले जनाएको छ ।
रेल्वे लिकको दक्षिणपट्टीको खाल्डोमा ती महिलाको शव फेला परेको हो । मृतक अन्दाजी २८ वर्षीया महिलाको सनाखत हुन नसकको तथा अन्य अनुसन्धान भइरहेको धनुषा प्रहरीका प्रबक्ता मकेन्द्र मिश्रले बताए ।
सर्लाहीको ईश्वरपुर नगरपालिका ६ बयलबास बजारमा पनि एक महिलाको शव फेला परेको छ । पहिचान खुल्न नसकेका महिलाको शव एनसीसी बैंक अगाडि फेला परेको सर्लाहीका प्रहरी प्रबक्ता मदन कुँवरले जानकारी दिए । अन्दाजी ३० वर्षीया महिलाको मानसिक सन्तुलन ठीक नभएकको र मागी खाने हिँडने भएको उनले बताए ।
यस सम्बन्धमा थप अनुसन्धान भइरहेको प्रहरीले जनाएको छ ।
