राष्ट्रिय फुटबल टिमका पूर्व कप्तान फुटबलर हरि खड्का हिमालय टेलिभिजनबाट प्रशारण भैरहेको रियालिटी शो ‘डान्सिङ विथ दि स्टार्स नेपाल’को शोबाट बाहिरिएका छन् । बटम ३ मा दुई पटक परेका हरि यो साता भने बाहिरिएका हुन् । हरि खड्का र उनको कोरियोग्राफर पार्टनर यूमी बलामीले ६ वटा प्रस्तुती यो शोमा दिएका थिए ।
यो साता बटम ३ मा हरि खड्का र यूमी बलामी, प्रियना आचार्य र सुभम् भुजेल, प्रशान्त ताम्राकार र स्वेत्ना योञ्जन परेका थिए ।
शोबाट बाहिरिदै गर्दा हरि खड्काले भने–‘यो शोमा आउनु नै हामी विजेता हुनु हो । नाच्न नै नजानेको मानिस शोमा आएर प्रस्तुती दिन पाउँदा खुशी लागेको छ । विजेता त्यो हो जो हारबाट डराउँदैन ।’यस्तै, यो साताको पर्फमेन्स अफ दि विकको विजेता भने ज्योती मगर र लाउरे भएका छन् ।
हरि खड्का बाहिरिएसँगै अब शोमा ९ जना स्टार्स र उनीहरुको कोरियोग्राफर पार्टनर रहेका छन् । यो शो हिमालय टेलिभिजनबाट हरेक साताको शुक्रबार र शनिबार बेलुकी ८ बजेपछि प्रशारण हुँदै आएको छ । शोमा नायिका गौरी मल्ल, नायक दिलिप रायमाझी र कोरियोग्राफर तथा निर्देशक रेनशा वान्तवा राई निर्णायकको रुपमा छन् । निर्णायकको मत र दर्शकको भोटको आधारमा एक जना प्रतिस्पर्धीले मञ्च छाडेर विदा हुनुपर्ने शोको नियम छ ।
