७ मंसिर, काठमाडौं । लण्डन क्लब चेल्सी प्रिमियर लिग फुटबलको शीर्ष स्थानमा उक्लेको छ । लिग अन्तर्गत शनिबार भएको खेलमा न्यूकासल युनाइटेडलाई २-० ले पराजित गर्दै चेल्सी शीर्ष स्थानमा पुगेको हो । लेस्टर सिटीसँग अंक बराबर भए पनि गोलअन्तरमा चेल्सी अगाडि रहेको हो ।
न्यूकासलको मैदानमा भएको खेलमा चेल्सीका लागि टमी अब्राहमले एक गोल गरे भने अर्को गोल उपहार पाएको थियो । खेलको १०औं मिनेटमा न्यूकासलका फेडेरिको फर्नान्डेजले आत्मघाती गोल गरेपछि चेल्सीले अग्रता बनाएको थियो । दोस्रो हाफमा चेल्सीले अर्को गोल थप्यो । ६५औं मिनेटमा टमी अब्राहमले गोल गर्दै चेल्सीको अग्रता दोब्बर पारेका थिए ।
जितपछि चेल्सीले ९ खेलबाट १८ अंक जोड्दै लेस्टरलाई गोल अन्तरमा पछि पारेको छ । एक खेल कम खेलेको लेस्टर समान अंक रहेपनि दोस्रोमा झरेको छ । ९ खेलबाट ११ अंक रहेको न्यूकासल १३औं स्थानमा छ ।
